Relato para "musicar": UN PASEO ACCIDENTADO
UN PASEO ACCIDENTADO
Henrique sae da súa casa moi contento porque por fin vai poder ir ao cine. No quiosco detense a comprar o xornal para ilo lendo polo camiño. Como anda distraído coa lectura non ve que hai obras na rúa e, sen sabelo, achégase a un sumidoiro aberto... Vai caer! De milagre, non pisa no burato.
Henrique segue co seu xornal e tampouco ve a farola que ten diante... Vai chocar! Casualmente, un paxariño distráeo da lectura co seu canto, e descobre o farol co tempo xusto para esquivalo.
Uns metros despois, aproxímase a unha pel de plátano que hai no chan... Vaina pisar! No último segundo, un empregado da limpeza evita a caída recolléndoa, pero Henrique non se decata.
Cando por fin chega ao cine, Henrique diríxese ao despacho de billetes e ve un cartel onde pon:
PECHADO POR DESCANSO.
- Desde logo -di-, que mala sorte teño hoxe!