Este mes experimentamos con vinagre, bicarbonato, colorante alimentario e un vaso. Como sempre o primeiro foi plantexar hipóteses: Como se faría o experimento?, En que orde habería  que usalos?, Que sucederá cando o fagamos?

Contrastamos as nosas hipóteses facendo o experimento, e descubrimos que se creaba un "volcan de espuma", da cor do colorante.

Chegou o momento de que cada un dos equipos levase a cabo o mesmo experimento, xa de forma autónoma. Chegando previamente a un acordo do que faría cada un dos integrantes, de xeito que todo o mundo participase.

Todos os equipos deron conseguido facer un volcán de espuma.

Tan só nos quedaba completar o noso caderno de campo, indicando os materiais empregados e o resultado obtido.

Nesta ocasión correspondeulles ó nosos compañeiros e compañeiras de Infantil 1, crear o vídeo do experimento. Podes ver o ben que lles quedou, de seguido.

No recanto de infantil atoparás os vídeos de tódolos experimentos anteriores.

Durante as últimas semanas continuamos coa nosa investigación sobre os ponis para atopar novas respostas ás nosas preguntas.

Podes ver os pasos previos desta investigación nas seguintes entradas publicadas neste mesmo blogue:

14/11/20: (2020-2021) Decidimos investigar sobre os PONIS para crear un documental. Tes algunha información?

27/11/20: (2020-2021) Seguimos coa nosa investigación sobre os “ponis”. Xa temos as primeiras respostas. 

18/01/21: (2020-2021) Continuamos a nosa investigación sobre os ponis e atopamos dúas novas respostas.

Para continuar coa nosa investigación, e respostar a novas preguntas das que tiñamos plantexadas, acordamos buscar tres de elas traballando en equipo.

O equipo PERIQUITO encargouse de investigar de que cores podían ser os ponis. Para elo, usaron o mural onde aparecían tólos tipos de ponis, para anotar as diferentes cores que tiñan.

Unha vez atopada a respota, anotárono no mual da investigación. 

E así quedou plasmado cando remataron:

O equipo TIBURÓN encargouse de investigar onde fan "fan caca" os ponis. Buscaron a resposta nun libro, onde pediron ó profe que lles lese nas páxinas na que crían que estaba a resposta. Anotaban o que ían descubrindo nun papel.

Tan só quedaba indicar a resposta no mural da investigación.

E así quedou a resposta plasmada no mural, tal como acordou o equipo que debería aparecer.

Por último, o equipo GATO encargouse de descubrir as partes que teñen os ponis. Para elo visualizaron un vídeo onde se falaba do tema. 

Foron anotando nunha lista as partes que ían escoitando. 

Acordaron plasmalo no mural de investigación deste xeito.

Así o deixaron reflexado:

Coas respostas xa atopadas cada un dos equipos contoulles ó resto o que descubriran. Deste xeito todos e todas xa coñecen o descuberto polos seus compañeiros e compañeiras.

A medida que imos investigando as diferentes preguntas, anotamos quen se encargou de investigalas, no apartado correspondente do mural.

Para investigar se os ponis "xogaban" e "traballaban", decidimos buscar a resposta todos xuntos. Visualizando diferentes vídeos.

Fomos anotando as resposta no mural da investigación, a medida que as iamos escoitando, acordando antes de que xeito plasmalo.

Tamén anotamos en que traballaban, e como ás veces os explotaban os humanos. Decidimos tamén indicalo no mual despois dun diálogo sobre o tema. 

Así está agora o noso mural, con case tódalas preguntas respondidas. 

Nos vindeiros días remataremos a investigación e poderemos comezar a crear o noso documental, o producto final que nos platexamos ó comezo da mesma, así como facer o dossier individual da investigación.

Tal como estaba anotado nos nosos calendarios online, estabamos xa na semana do Entroido. O primeiro que fixemos foi lembrar (nas publicacións dispoñibles na web) como o celebramos o curso pasado.

Descubrimos que como entón non había COVID-19, puideron vir as familias a participar nun obradoiro connosco no colexio, que participamos nun desfile polas rúas, onde a xente non tiña mascarilla, e que fixeramos unha festa con postres típicos do Entroido.

Neste curso, pola contra, non sería posible contar coas nosas familias, nin facer a festa cos postres nin facer o desfile polas rúas do concello... pero iso non quería dicir que non fósemos celebrar o Entroido. Sería dun modo diferente. Xa voltará a ser igual de xenial o vindeiro curso.

INSTRUCIÓNS DO MECO: O PORCOESPÍN SERAFÍN MANDA:

Participamos nas instrucións do noso MECO, a mascota da biblioteca "Serafín o porcoespín". Nós fomos os encargados en dar a primeira instrución para todo o colexio.

Ocurríusenos propoñer que todos viñeran co pixama posto, e así o escribimos no cartel que penduramos debaixo de Serafín.

Cada día os diferentes cursos do colexio foron publicando as instrucións do que había que traer. Deste xeito, antes de saír ó recreo, pasabamos a ver cal era a instrución para o día seguinte...

... para anotala nunha nota que levamos para casa. 

O luns, tal como escolléramos viñemos en pixama.

O martes, os de 1º e 2º decidiron que viñeramos con algo na cabeza.

O mércores os de 3º e 4º escolleron que había que traer algo no pescozo.

Por último, o xoves, os compañeiros e compañeiras de 5º e 6º propuxeron que cada un viñese disfrazado como quixese.

Cada día fomos completando un rexistro, con estas fotos de grupo, que había que pegar no día correspondente, e escribir cal era a instrución de Serafín. 

DESEÑANDO E CREANDO O NOSO DISFRAZ:

Este curso, no que celebraríamos o Entroido dun modo tan diferente, o centro acordou que cada curso viría disfrazado dun conto.

Despois de propoñer varios dos contos que tiñamos nas aulas, acordamos que poderíamos disfrazarnos do "CAPITÁN VERDEMÁN", que loitaba porque non houbese lixo nin contaminación.

Escribimos unha lista das partes que debería ter o noso disfraz. 

Creamos o primeiro modelo de disfraz, creando as diferentes partes, e fotografando cada un dos pasos. Usaríamos esas imaxes para redactar as instrucións para facer o disfraz. 

Xa estaba listo o primeiro modelo de "disfraz de Capitán Verdemán".

Redactamos e creamos as instrucións para facer o noso disfraz, posto que aínda que non houbese obradoiro coas familias, seguro que as íamos precisar:

Creamos unhas instrucións en cada unha das aulas.

Puxémonos mans á obra para crear os nosos disfraces seguindo os pasos que indicanban as instrucións.

De cando en vez tivemos que revisalas para aseguranos de cal era o seguinte paso a dar.

E, por suposto, era imprescindible pasar o "test de calidade", comprobando se aguantaban as pezas cando corríamos ;)

Xa estaban os nosos disfraces listos para usalos no desfile no colexio.

O día do desfile, despois de facernos as fotos individuais (que podedes ver máis abaixo), xa estabamos preparados para participar na celebración no colexio. 

Aquí podes ver como quedaron os disfraces que fixemos. Fai click na seguinte imaxe para vernos a todos e todas.

Participamos no desfile no pavillón, xunto cos demais compañeiros e compañeiras do colexio. Eso si, respectando as normas de seguridade COVID-19.

E como remate de festa despedimos ó noso MECO, ó porcoespín Serafín. 

Agardamos que o vindeiro curso poidamos celebrar o Entroido coa participación das nosas familias, e que volte a ser como sempre.

Podes ver o vídeo do desfile e da celebración do Entroido de seguido, ou facendo click na seguinte publicación:

(2020-2021) Celebramos un Entroido... de conto. Xa podes ver o vídeo do noso desfile.

Durante a semana anterior á celebración do "Día da Paz" en Infantil viaxamos polo mundo, para descubrir diferentes culturas e formas de vida. Completando o noso "pasaporte" en cada viaxe.

De cada un dos lugares "trouxemos un recordo en vídeo", que fomos creando despois de investigar sobre ese país.

Podes ver os vídeos que elaborou cada un dos equipos de seguido, facendo click na seguinte imaxe (ou entrando en O Cervo TV).

Para poder facer estes vídeos o primeiro foi descubrir os seis países que visitaríamos, coñecendo os aspectos máis importantes da súa cultura: como falan, que comen, onde se atopan, datos relevantes...

Xa cos destinos repartidos por equipos, cada un deles foi anotando nun listado os datos máis importantes que contarían no seu vídeo.

Con eses datos listos, e despois de térense organizado dentro de cada equipo, foron gravando as diferentes tomas do seu vídeo diante do "chroma", no que logo aparecerían outras imaxes e vídeos relacionados.

Mentres os profes ían "montando" os vídeos, creamos os nosos pasaportes, como proba das nosas viaxes. Coloreando as bandeiras de cada un dos países.

Escribindo o nome de cada país e completando os nosos datos persoais: nome e foto. 

Marcando no mapa onde se atopaban os seis países visitados.

Por último, na folla de cada país, pegamos un código QR do vídeo que, o equipo correspondente, creara sobre ese país.

Probamos cunha tableta que, efectivamente, os códigos funcionaban correctamente e amosaban o vídeo que correspondía.

Queres ver como quedou o noso pasaporte?, podes velo facendo click no seguinte libro dixital.

Visionamos os nosos vídeos e fixemos unha valoración crítica dos mesmos. A ti que che parecen?

E, por suposto, bailamos moitísimo con cada vídeo.

Xa de volta da nosa viaxe polo mundo, os nenos e nenas de ámbalas dúas aulas, fixeron as súas "froitas da paz", para pegalas na árbore que crearíamos xunto ó resto de compañeiros e compañeiras do colexio.

Escribimos palabras relacionadas coa paz, para poder escoller entre elas.

Cada quen escolleu a súa palabra favorita da "Paz" e escribiuna na froita que elexiu. Coloreándoa e recortándoa para que quedaran listas.

Cando chegou o día da celebración do día Paz no colexio, participamos na construición da árbore, pegando as nosas froitas xunto ás dos compañeiros e compañeiras.

Tamén bailamos a canción "El mismo sol" xunto ós demais cursos do colexio. Cunha coreografía que nos ensinara o profe Jose Luis de música.

Podes atopar máis información sobre esta celebración, e ver o vídeo do baile, na seguinte ligazón:

Blog da biblioteca (2020-2021) Celebramos o Día da Paz, cunha árbore de desexos e un baile. Queres velo?

No mes de Xaneiro, ELSA e VALERIA estiveron de aniversario. Este curso por mor da COVID-19 tivemos que cambiar a forma que os celebramos e, no lugar da festa que organizábamos cociñando a unha tarta, celebrámolo deste outro xeito.

Entre todos e todas decoramos unha camisetas ás homenaxeadas, escribindo os nosos nomes para que non se esquecesen de nós.

Ademais das coroas de aniversario, que elas mesmas decoraron, e vestindo as camisetas de agasallo, ó ultimo venres do mes celebramos os aniversarios.

Sopramos uha candea co número dos anos que cumplía cada unha. 

No mes de febreiro teremos novos aniversarios.

Nas primeiras semanas de xaneiro, á volta do Nadal, continuamos a coidar as nosas leitugas no invernadoiro. 

Podes atopar máis información na seguinte ligazón:

14/12/20: [Infantil xuntos] (2020-2021) ECO-BIO-SAN: Os de infantil plantamos e coidamos tres tipos de leitugas no invernadoiro do colexio

Pero ademais, ó igual que os restantes compañeiros e compañeiras do colexio que participan nesta proposta de Biblioteca Escolar: "ECO-BIO-SAN 2.0"; tamén investigamos sobre as leitugas para descubrir datos moi interesantes.

Cos datos máis relevantes que descubrimos, e fomos anotando nunha lista, creamos as diferentes páxinas do noso libro.

Así quedou o libro de infantil unha vez rematado.

Fai click sobre a seguinte imaxe para velo completo.

Varios días á semana imos a regar as nosas leitugas ó invernadoiro, e anotamos no "caderno de campo" como van cambiando a medida que pasa o tempo.

Ademáis tamán continuamos a usar o composteiro, para conseguir o "compost" que empregaremos en vindeiras plantacións.

Podes ver o noso caderno de campo de seguido.  

Fai click sobre a seguinte imaxe para velo.

Durante as últimas semanas continuamos coa nosa investigación sobre os ponis para atopar novas respostas ás nosas preguntas.

Podes ver os pasos previos desta investigación nas seguintes entradas publicadas neste mesmo blogue:

14/11/20: (2020-2021) Decidimos investigar sobre os PONIS para crear un documental. Tes algunha información?

27/11/20: (2020-2021) Seguimos coa nosa investigación sobre os “ponis”. Xa temos as primeiras respostas. 

Como xa pasara algún tempo desde o último día de clase, polas vacacións de Nadal, lembramos todo o que xa descubríramos e as preguntas que nos quedaban por respostar, na nosa investigación sobre os ponis.

Fomos anotando no noso mural da investigación, como iamos organizando o traballo. Polo momento tódalas preguntas fómolas respostando "en gran grupo", pero a partir de agora, que xa temos práctica, comezaremos a facelo tamén nos equipos cooperativos.

Descubrimos QUE COMEN E BEBEN OS PONIS, para o que tivemos que visionar varios dos vídeos que temos no noso recanto online da investigación. Finalmente demos con un no que se falaba deste asunto.

A medida que o vídeo ía dicindo o que comían, fómolo anotando entre todos e todas, nunha lista.

Tamén atopamos algunha resposta nova, no libro que tiñamos no recanto da investigación da clase. Por suposto, anotamos esta resposta na lista.

Coas respostas xa descubertas, tan só quedaba plasmalas no noso mural da investigación, escribíndoas e pegando fotografías de cada alimento. Buscámolas e internet, imprimímolas, recortámolas e pegámolas... como vedes unha chea de traballo.

E xa quedou lista a resposta a esta pregunta.

Outra das preguntas que tiñamos, e á que tamén atopamos a resposta foi, "QUE TIPOS (RAZAS) DE PONIS HAI". Buscamos nos diferentes vídeos (discriminando cal deles era o que falaba deste tema e non de outro); así como na documentación impresa que tiñamos no recando da investigación.

Con cada nova raza que iamos descubrindo, comprobamos se nós medíamos máis ou menos que ese poni. Sabías que existe un poni "galego"?

Cando xa atopamos todos estes "tipos" de ponis,  costounos moito contalos, pero finalmente descubrimos que eran 28.

Fomos enchendo o noso poni a tamaño real, que tiñamos no corredor, e do que xa vos falamos noutra entrada, coas diferentes razas e ponis. Pegando a súa foto xunto cunha etiqueta na que escribimos o seu nome e altura.

Escribimos entre todos e todas un título, para que todo o mundo soubera de que se trataba, e o número de razas que atopamos, escribindo o número 28.

E así quedou o noso poni, a escala 1:1, coas 28 razas de ponis que atopamos.

Tan só nos quedaba anotar esta resposta no mural da investigación.

Decidimos incluír tamén unha foto do poni que temos no corredor, para que todos saiban que poden ir alí a ver as razas de ponis; porque non nos cabían no mural, segundo a conclusión á que chegamos.

Así está agora mesmo o noso mural da investigación:

Aínda nos quedan algunhas respostas por atopar, para poder crear o noso vídeo-documental.

Nas vindeiras semanas continuaremos con esta investigación, da que poderedes coñecer todo o que sucede en sucesivas entradas neste mesmo blogue.

Por fin chegou o mes de decembro, que todos e todas estabamos agardando, posto que no noso calendario online aparecía marcado que era o mes de NADAL.

De seguido poderás coñecer todo o que fixemos durante este mes, nas aulas de infantil, para celebralo.  

VAIA SORPRESA!! TODO O COLEXIO APARECE DECORADO. ATA AS PORTAS:

Nuns dos primeiros días do mes, cando chegamos pola mañá, todo o colexio estaba decorado, ata as portas das clases eran agora "navideñas". En Infantil atopámonos cunha cheminea e un Santa Claus "enorme".

Tamén puxemos o noso gran de area para mellorar a decoración da porta de EI2, montando e creando as nosas botas.

Visitamos os corredores do colexio para ver a decoración que había en tódalas portas: Reis Magos, renos, pingüíns... non faltaba de nada.

Podes ver como quedou o colexio decorado polo Nadal, con tódalas súas portas, no seguinte álbum da galería fotográfica:

(2020-2021) [galería fotográfica] Decoración de Nadal 

CONVERTÍMONOS EN SANTA CLAUS:

Na porta "cheminea", aparecían fotos dos nosos equipos convertidos en Santa Claus. Empregaríamo-las para facer varias cousas, que vos contamos de seguido, pero aquí podes velas todas

Lembra que podes facer click en cada unha para amplialas.

CREAMOS E DECORAMOS A NOSA ÁRBORE DE NADAL:

Como cada curso, creamos e decoramos a nosa árbore de Nadal. Nesta ocasión, empregamos unha estructura de paus de madeira, para crear esta "orixinal árbore"

Pintamos a estrela que coroaría a árbore...

... e cada un foi creando o seu adorno, con masa branca.

Cunha man de pintura e algo de pururina, quedaron listos para penduralos na árbore.

Así de fantástica quedou unha vez rematada.

DECORAMOS O CORREDOR DE INFANTIL:

Ademais da árbore, tamén decoramos o noso corredor cuns adornos xigantes que escolleron e crearon cada un dos equipos.

Tiveron que falar para chegar a acordos e buscar estratexias de colaboración, para poder facelo entre todos e todas (como por exemplo para poder pintalo polos dous lados sen marchar a mesa)

Dentro dos adornos pegamos a nosa foto de "Santa Claus" da que xa vos falamos antes.

Cuns calcetíns, papel e moita "maña", craamos uns bonecos de neve moi simpáticos. Tan só había que ir seguindo os pasos que atopamos en internet e que nos ían dicindo os profes. 

Por suposto tamén escribimos o noso cartel de BO NADAL, para dar a benvida ó noso corredor navideño.

Novamente traballamos por equipos, para acodar como decorar a letra que lle correspondeu a cada un.

Así quedou ó noso corredor decorado, co cartel, os adornos xigantes e os bonecos e neve pendurados do teito. 

METÉMONOS DENTRO DUNHAS BOLAS DE NEVE:

Usando as fotografías nas que aparecíamos como Santa Claus, creamos unas bolas "con neve dentro", para decorar a árbore de Nadal nas nosas casas. 

Unha vez rematadas levámolas para as nosas casas para poder poñelas na árbore de Nadal. 

ENVIAMOS  ÁS NOSAS CASAS UNHA POSTAL CUN "RENO" :

Creamos unha postal de "reno" para enviar ás nosas casas. A cara do reno fixémola pintando os nosos pes e estampádoos nun papel. Estaba un pouco frío e facía cóxegas, pero foi moi divertido.

Esa pegada dos noso pe foise convertido na cabeza dun reno, para o que tivemos que ir poéndolle as diferentes partes que a formaban: os ollos, os cornos... 

Cun pompóm como nariz estaba rematada e lista para escribir nela a nosa mensaxe de felicitación.

Metímola nun sobre, puxémoslle os enderezos das nosas casas e, cun selo, xa estaban listas para seren enviadas.

Coa posal xa preparada, marchamos ata o buzón, que hai preto do colexio, para envialas por correo.

Como chovía cando chegamos, mandamos a profe CRIS "nunha arriscada misión", para metelas todas no buzón. Mentras nos, co profe ÓSCAR, dábamoslle anímos a cuberto ;)

ESCRIBIMOS A NOSA CARTA A SANTA CLAUS, OS REIS MAGOS OU Ó APALPADOR:

Tamén escribimos a nosa carta para Santa Claus, os Reis Magos ou o Apalpador. Non podíamos esquecernos de escribir o noso nome nela.

Metímolas todas dentro do buzón que había no colexio.

PREPARAMOS A NOSA PARTICPACIÓN NO FESTIVAL DE NDAL ONLINE:

Este curso, por mor da COVID-19, non habería Festival de Nadal coas familias como público, pero iso non impediu que participásemos no FESTIVAL DE NADAL ONLINE.

Nesta ocasión cada curso prepararía unha actuación, que gravaríamos en vídeo, e sería publicada na web do colexio o día 22 de decembro ás 12:20 horas. Nese mesmo día e hora tamén o veríamos en tódalas aulas, á vez que as nosas familas nas casas.

Nós participaríamos coa obra de teatro "A tartaruga que quería durmir na noite de Nadal", que contaría coa participación estelar do famoso grupo "Os renos rockeiros".

Tivemos que preparar parte do decorado e atrezzo, buscar os difraces, repartinos os papeis... antes de poder gravala.

Unha vez reamatada a gravación miramos como quedou, para dar a nosa valoración crítica, antes de que fose incluído no festival de Nadal do colexio, xunto coas demais actuacións.

O día 22 de decembro, na hora sinalada, á vez que o resto do colexio (e do mundo na web do colexio), puidemos ver tódalas actuacións. Ademais de na nosa obra de teatro, tamén nos encargamos de presentar o festival.

E claro, non puidemos evitar bailar cos "Renos rockeiros".

Podes ver o festival completo de seguido, lembra que a nosa actuación é a primeira, e que ó final tedes unha mensaxe dos profes.

(2020-2021) Xa podes ver o Festival de Nadal 2020 - ONLINE.

Que teñades un BO NADAL e un mellor ANO 2021. Vémonos en Xaneiro con moitas máis cousas.

Como xa vos contamos na entrada correspondente ós aniversarios do mes de novembro, este curso temos que celebralos dun xeito diferente, por mor da COVID-19.

Nesta ocasión só ENZO estaba de aniversario este mes, no que cumpría 4 anos.

Como sempre, preparamos a súa camiseta de agasallo, feita polos compañeiros e compañeiras da súa aula, e seguindo as súas indicacións.

Tamén escribimos o noso nome parta de atrás, para que sempre puidese lembrar o seu cuarto aniversario. Por suposto tamén creou a súa coroa de homenaxeado.

O día da celebración, pese a non poder celebrar unha festa nin cociñar a tarta, como facíamos sempre, si puidemos cantarlle a canción correspondente...

... e soprar as candeas, nunha tarta "de mentira".

Agardamos que moi pronto, poidamos voltar a celebrar os aniversarios como nos gusta, cunha grande festa e cociñando a nosa propia tarta.

Ademais de iniciar a nosa investigación sobre os Ponis, levar a cabo o noso primeiro experimento, celebrar os aniversarios do mes, descubrir novos robots e iniciar a plantación no invernadoiro; tamén sucedeu todo isto no mes de novembro. Podedes descubrilo todo nas respectivas entradas, publicadas neste mesmo blogue.

Cando comezou o mes de novembro, anotamos no calendario oline da nosa aula, que podedes atopar no recanto de infantil, todas as datas sinaladas como os aniversarios que terían lugar.

O encargado de cada día foi levando a cabo as súas tarefas, entre elas darlle a súa comida ás nosas tartarugas Rayo e Evan.

Continuamos a completar o noso dicionario xigante, coas nosas palabras favoritas, que comezan cunha letra cada semana. Os nosos diccionarios individuais tamén continuaron a medrar con estas novas palabras.

Os venres levamos libros da biblioteca de aula para as nosas casas, rexistrándoos na aplicación online para imprimir a portada e completar o libro "dos préstamos" en papel. Respectando sempre as medidas de hixiene marcadas (limpando o teclado e rato entre cada uso)

Continuamos a desenvolver os nosos pilares de pensamento, usando diálogos, "xogando a pensar" con vídeos, imaxes ocultas, etc.

Participamos na creación do mural, feito por todo o centro, no "Día internacional para  a eliminación da violencia contra as mulleres", poñendo o noso gran de area. O deseño era obra de Héctor, imán da nosa compañeira Valeria.

Podes ver o traballo levado a cabo por todo o centro, na seguinte entrada da biblioteca (2020-2021) Pintamos un mural para celebrar o "Día internacional da eliminación da violencia contra as mulleres", onde poderedes atopar tamén o vídeo da creación do mesmo.

Marc Taeger, o ilustrador que nos axudou a crear o mural, asinounos un dos seus libros que temos na aula: "Un maís" 

Creamos o noso vídeo para o programa da TVG "Os Bolechas no cole", do que xa vos contaremos, máis chegado o seu momento ;)

Continuamos a reinterpretar cadros de diferentes pintores e pintoras, usando diversas técnicas plásticas, para desenvolver a nosa creatividade.

"Dos Mujeres" de Frida Kahlo:

"Elefantes" de Salvador Dalí:

"Inverno" de Goya:

"Outono" de Van Gogh:

"Upward" de Kandinsky:

Cada semana as nosas creacións quedan expostas na nosa exposición.

Segue a coñecer todo o que sucede na nosa aula, nas diferentes entradas que publicamos neste blogue.