Presentación | Horarios | Oferta educativa | Secretaría | Contacto
ADEUS RÍOS, ADEUS FONTES
Empezamos abril con celebracións e celebramos, o venres día 1, o Día das Árbores, o Día da Auga e o Día da Poesía. Fomos con nenos e nenas dos outros colexios de Fene ata o Parque Lineal de Vilanova; e alí, nunha zona que estaba xa destinada para o colexio Centieiras, plantamos cinco cerdeiras bravas e un bidueiro.
Tivemos sorte, porque nos tocaron unhas árbores preciosas; sobre todo as cerdeiras, que, como son bravas, dan moitísimas flores e ao estaren tan xuntas han parecer cinco nubes de algodón branco en cada primavera, e máis aínda cando medren, porque son árbores que chegan a ter máis de vinte metros de alto.
Foi un día moi bonito, as alumnas e alumnos de cuarto e quinto xogamos, demos un paseo pola beira do río e escoitamos e lemos poesías; todos non, da nosa escola tocoulle a Roi, o delegado de quinto, ler unha poesía moi bonita de Manuel María, “O arco da vella”. Ah, e merendamos alí, porque nos deron unha mazá e unha botella de auga!
Pasámolo tan ben que, se nos chaman, para o ano volveremos! (e antes tamén, porque queremos ver como van medrando as nosas árbores).