Trátase de que cada un de nós faga unha unidade didáctica utilizando eXe-Learning. Antes de poñérmonos á tarefa cómpre facer unha pequena recapitulación de varios aspectos básicos:

• Un proxecto eXe consta de dous elementos fundamentais:
  • Un grupo de páxinas, cada unha das cales inclúe uns contidos determinados, vertebrado arredor da árbore de contidos, que se crea na fiestra Resumo.
  • Os contidos concretos de cada páxina créanse coas ferramentas ou iDevices.
• eXe permítenos crear recursos educativos partindo de cero ou empregando materiais que xa teñamos elaborados, pero tamén podemos usar recursos procedentes da rede, xa sexan textuais, gráficos ou multimedia.
• Xa que logo, os pasos que debemos dar para construír un recurso educativo ou, no noso caso, unha unidade didáctica, son os seguintes:
  • Instalamos eXe.
  • Construímos un catálogo índice coa árbore de contidos na fiestra Resumo.
  • Utilizamos as ferramentas ou iDevices para encher de contido cada un dos apartados da nosa árbore de contidos.
  • Se é o caso, importamos paquetes (ou exportámolos) só con pinchar co botón dereito do rato en calquera apartado ou subapartado do índice.
    
  • Definimos o estilo da nosa unidade didáctica escolléndoo na pestana Estilos da barra de menús superior.
  • Definimos as propiedades do noso proxecto na pestana de Propiedades.
  • Para rematar, exportamos o noso proxecto ao formato que máis nos interese, segundo o uso que lle vaiamos dar: en modo local, en internet en xeral (por exemplo nun blog) ou nunha plataforma de teleformación, como pode ser Moodle.