(Clica para ver as fotos e vídeo) Polo san Martiño trompos ao camiño e pola santa Olaia, trompos á borralla. O venres 10 de novembro celebrouse o magosto no centro. O asado de castañas e os xogos populares, fixeron do día, unha xornada chea de risas, movemento, interacción, olor a castañas, participación, convivencia, que crearon un ambiente cálido e distendido, onde nos transportamos ás tradicións do outono. Faltaba o veraniño de san Martiño, pero se chove que chova. 

Hoxe, 25 de outubro de 2023, recibimos a Eva Méndez Santos, do centro de apoio educativo APREHENDO de Gondomar.

A súa charla abordou o tema do acoso escolar co alumnado de 1ºC-ESO.

Queremos agradecer a relatora o seu bo facer e a sintonía que acadou cos alumnos e alumnas. Por sorte, pronto volverá para tratar deste mesmo asunto cos grupos de 3º de ESO.

O club de lectura do IES Val Miñor comeza  con estas dúas novelas. A primeira pensada para a ESO e a segunda para Bacharelato.

Consulta as bases aquí abaixo no documento adxunto:

Laura Álvarez

O próximo luns 23 de outubro ás 18:30 horas no Salón de Actos do IES VAL MIÑOR terá lugar a sesión informativa sobre o proxecto de comunicación e prevención do Val Miñor (Habilidades comunicativas intrafamiliares e prevención de consumo de tóxicos) cuxas relatoras son persoal sanitario cualificado en habilidades sociais.

Estará dirixido para as familias e o alumnado de 3º de ESO.

O obxectivo do obradoiro realizado en colaboración co CIM e con Cru Producións é reflexionar sobre o presente e o futuro da educación mediática tendo presente de maneira especial a necesidade de suscitar actitudes críticas respecto aos medios de comunicación e produtos audiovisuais.

Vane, Yago e David, alumnos do centro de Educación Especial, faláronlle ao noso alumnado de 1º de bacharelato do voluntariado. Agradecemos o seu gran labor e as súas ensinanzas. Grazas por todo.

O club de lectura do IES VAL MIÑOR comeza un novo curso con renovadas ilusións e con máis participantes que nunca.

Boa lectura para todos e todas!.

A poeta compostelá Yolanda Castaño, cunha traxectoria prolífica e amplamente recoñecida en Galicia, vén de ser galardoada co Premio Nacional de Poesía 2023 polo Ministerio de Cultura e Deporte polo seu poemario Materia, valorado polo xurado como "unha poderosa proposta poética na que cada estado da materia se expresa nun ton propio".

O cine en galego segue a triunfar! Despois de que As Bestas, de Rodrigo Sorogoyen, arrasase na última edición dos Premios Goya, o pasado sábado 30 de setembro a directora donostiarra afincada en Santiago de Compostela Jaione Camborda fixo historia no Festival de Cine de San Sebastián ao ser a primeira muller española en gañar a Cuncha de Ouro. Fíxoo coa súa segunda longametraxe, O Corno, rodada en galego e de produción galega. O filme, protagonizado pola bailarina porriñesa Janet Novás, que con este traballo debuta como actriz, está ambientado na Illa de Aurosa a comezos dos 70, pero trata un tema moi actual: o dereito ao aborto.

A película estréase en Galicia o martes 3 deste mes no Festival Curtocircuíto, e chegará ás salas o día 11. Non vola perdades!

Aquí podedes ler unha entrevista á directora e ver o trailer da película: