Os clubs de lectura de 1º e 2º da Eso comezamos a nosa aventura co libro de Elena Gallego, DRAGAL, A HERDANZA DO DRAGÓN.

Estamos seguros de que o PROXECTO DRAGAL será unha experiencia inesquecible coas actividades que imos compartir co IES de Becerreá, o CPI Cernadas de Castro (Lousame), o CPI Plurilingüe de Vedra, o IES Nº 1 de Carballiño e o IES de Cotobade.

O comezo da aventura, AQUÍ

Velaquí as ENQUISAS para actualizarmos o estudo sociolingüístico.

INTERVENCIÓN DO KOMANDO POÉTIKO ITINERANTE

O pasado marzo, mes da poesía, entramos en todas as aulas para enchelas de versos. 

Este foi o poema poema colectivo co que tomamos as aulas, e podes ver un vídeo se PREMES AQUÍ.

Quieto todo o mundo!!

Estades a punto de sufrir un atentado estrófico

unha catarata silábica

un terremoto de fonemas

somos o Komando poétiKo itinerante

(só BOLBORETAS sairán da miña boca)

estamos cargadas de bombas gramaticais

a nosa morfoloxía está a proba de balas

a nosa fonte de enerxía son as PALABRAS

PALABRAS

PALABRAS

rápidas elásticas   rítmicas

próximas máxicas omnívoras íntimas poéticas

wonderfull words words words

(só BOLBORETAS sairán da miña boca)

resistimos a caverna do silencio

rexeitamos un único pensamento

somos   listas lindas raras divertidas diversas

posuímos unha sintaxe explosiva

fame de lobo

sede de río

pés chantados na terra para conquista-lo futuro

(só BOLBORETAS sairán da miña boca)

chega a tristura da despedida

dicide, compañeiros, sen a palabra que nos queda?

que nos queda?

que nos queda?

(só BOLBORETAS sairán da miña boca)

Voamos?

VOAREMOS

VOLTAREMOS

berros... aturuxos… viva a poesía!!!

Este mes das LETRAS, como xa é tradición, participamos no CORRELINGUA cos centros educativos do Baixo Miño. Máis de 800 alumnos de Tui, O Rosal, A Guarda, Salvaterra e Tomiño (os nosos fantásticos anfitrións) botámonos ás rúas para celebrar e defender o GALEGO baixo o lema: A NOSA CREACIÓN COMÚN.

Por iso, porque é a nosa maneira de ver e de estar no mundo, camiños por Tomiño, lemos o manifesto, escoitamos a Xurxo Souto e gozamos do concerto de SACHA NA HORTA. Ao final, unha festaza a prol da lingua que nos fai únicos no mundo. DÁLLE AQUÍ AO RATO PARA VER AS FOTOS

 Mais, sen dúbida, o mellor de todo foi a actuación do grupo de baile do Instituto coordinado pola profe Nieves. E se non CLICADE AQUÍ!!

ENQUISAS

^{ENCONTRO SOCIOLINGÜÍSTICO, MÚSICA E MOITO MÁIS!!}

^{O 29 de abril, alumnado de 3º da ESO do IES de Salvaterra e o CPI de Mondariz van participar nunha xornada de convivencia e traballo sociolingüístico.}

^{As actividades -programadas polos equipos de Dinamización Lingüística, Bibliotecas e os departamentos de Lingua e Matemáticas de ambos centros-, dan continuación a unha xornada semellante que tivo lugar o curso pasado no concello de Mondariz.}

^{A primeira hora recibiremos o alumnado de Mondariz no centro e xuntaremos os equipos de traballo. A continuación, tomaremos as rúas de Salvaterra para realizar un ESTUDO SOCIOLINGÜÍSTICO DO USO DO GALEGO NO SECTOR SERVIZOS.}

^{Para isto, imos realizar enquisas nun total de 120 establecementos. Despois reunirémonos na Casa da Cultura, onde dixitalizaremos a información, elaboraremos as estatísticas e realizaremos as reflexións sociolingüísticas pertinentes.}

^{Tras unha mañá de traballo intensivo, habemos recuperar folgos cun xantar no parque da Canuda. Enfiaremos así a tarde para achegarnos ao mundo da música contemporánea na nosa lingua, coa actividade que pon o colofón á xornada: GARCÍA MC, vocalista dos Grupos Dios ke te crew (DKTC) e Labregos do Tempo dos Sputniks realizará un obradoiro HIP HOP no noso instituto.}

^{Para levar a cabo esta xornada contamos coa total colaboración do Concello de Salvaterra.}

Marzo é o mes da poesía

por iso fixemos esta escolma de versos de noso

para dicir    cantar     contar     berrar ben alto que

A POESÍA PRESTA

Queremos tanto a ROSALÍA DE CASTRO

Ela falou por tod@s

e agora tod@s somos ela.

Por iso fixemos este vídeo para a AELG

para celebrarmos o seu día o 24-02-2015

Velaquí as enquisas para actualizarmos o estudo sociolingüístico do centro:

 ALUMNADO

PROFESORADO

CERTAME MICRORRELATOS 2014

GAÑADORES/AS

1º ESO

1º. Espertar, Sara Faro Lubiáns

2º. O meu último soño, Noemí Agulla Casais

2º ESO

1º. Unha festa mortal, Juan Bargiela Souto

2º. Curta vida, Candela González Calvar

3º ESO

1º. Bolboretas, Sofía Bancoff

2º. Sen título, Noelia Fontán

1º Bacharelato

1º. Cambios, Silvia Nodal

2º. V, Laura Guerrero Gómez

Parabéns a todos e todas as participantes. Todos os relatos presentados era moi bos, pero… alguén tiña que gañar!!!  Os relatos serán publicados no próximo número da revista escolar O Estoxo. Moitas grazas por participardes, e ao xurado, polo seu traballo.

Equipo de Dinamización da Lingua Galega

IES Salvaterra de Miño