O 22 de novembro o alumnado de 1º e 2º ESO asistiu á obra de teatro "El asesinato del profesor de Matemáticas" no Cine Teatro Salesianos. A actividade foi organizada polo departamento de Lingua Castelá e Literatura do instituto.

Para conmemorar o pasado Día do Libro, do 23 de abril, o Departamento de Lingua Castelá e Literatura realizou unha serie de actividades no centro como homenaxe ao escritor máis importante das nosas letras: Miguel de Cervantes. Así, o alumnado de 3º ESO, coa axuda do Departamento de Ed. Plástica e Visual, realizou un mapa coa ruta de Don Quixote por Castela a Mancha. Nel incluíron fragmentos onde aparecían os lugares da ruta, fotografías deses lugares emblemáticos hoxe en día e mesmo poemas dedicados á obra cervantina. Tamén realizaron un proxecto chamado “Se Don Quixote volvese”, no que recollían noticias en periódicos que lles parecesen inxustas e relacionábanas con fragmentos da obra nos que Don Quixote loitaba por defender distintos valores como a xustiza, a tolerancia, a loita contra a pobreza, a igualdade de dereitos entre homes e mulleres… Así, déronse conta de que o personaxe de Cervantes é moito máis avanzado ideoloxicamente do que eles pensaban. Por outro lado, o alumnado de primeiro de Bacharelato, investigou e expuxo unha mostra das portadas de todas as versións de Don Quixote da Mancha que se fixeron en todo o mundo, co que se deron conta da importancia desta obra para a literatura universal. Para rematar, o luns día 25, realizouse unha lectura continuada da novela no salón de actos, na que foron participando nas distintas horas todos os grupos do centro, dende 1º ESO ata 1º Bacharelato. E agora só queda por descubrir o resultado do concurso de relatos e poesía convocado e seguir festexando o Día do Libro todos os días do ano.

O 21 de Marzo é o Día Mundial da poesía e dende o Departamento de Lingua Castelá quixemos celebralo con diferentes actividades que poetizaran as nosas xornadas no instituto. Así, o alumnado de 3º da ESO expuxo os seus poemas favoritos nos taboleiros da entrada do centro e tamén montaron un recanto de “Farmapoesía” no que conxugaron a orixinalidade con todo o que aprenderon en literatura este curso. Por outra banda, colocouse na entrada un cesto con agasallos en forma de poemas para aqueles que quixesen coller un, ademais dunha selección de libros de poesía das diferentes linguas que se imparten no centro. E para rematar, o alumnado de 3º da ESO tivo a sorte de poder contar coa presenza no instituto da poeta Marisa López Soria, un referente, ademais, no ámbito da literatura infantil e xuvenil. Ante o alumnado de 4º da ESO falou da súa vocación pola escritura, da súa concepción da poesía como xénero que xorde das propias vivencias e o lento exercicio de atopar as palabras exactas para falar das cousas. Na súa intervención houbo un recordo especial á figura da súa nai, Josefina Soria, e outras autoras da súa xeración ás que se achegou poeticamente nun dos seus últimos traballos, como coautora de Ellas vuelan, sentida reivindicación dos seus legados.

O pasado 15 de outubro celébrase en toda España o Día das escritoras, unha festividade que xurde co obxectivo de recuperar e reivindicar a figura das mulleres escritoras, que veu sendo negada ao longo da historia da literatura. A selección deste día non é fortuíta, senón que se debe a que este día é a festividade de Santa Teresa, patrona de todos os escritores españois. Por iso, o Departamento de lingua castelá xunto ao alumnado de 3º da ESO propúxose buscar ás mulleres escritoras desaparecidas dende a Idade Media ata o século XVIII e, para iso, deseñou uns carteis que colgamos na entrada do centro, para dar a coñecer a escritoras como Olivia Sabuco, Sor María de San José, Luisa Sigea, Juliana Morell ou Isabel de Castro e Andrade. Todas elas merecen que as atopemos e as coloquemos no sitio de onde nunca deberon ser quitadas: a historia da literatura.

- Luisa Sigea

- Olivia Sabuco

Co gallo do Día do Libro 2021, o Departamento de Lingua castelá e Literatura organizou unha serie de actividades que se expuxeron en distintas localizacións do centro dende a semana pasada. O alumnado de 1º e 2º de ESO, axudados polo Departamento de Educación plástica e visual, confeccionaron as súas propias cartoneiras. Foi unha boa oportunidade de coñecer esta tendencia que algunhas editoriais alternativas promoveron sobre todo en Hispanoamérica dende 2003. A entrada do instituto encheuse así da cor e alegría que as portadas deseñadas polo alumnado achegaban. Por outra banda, o alumnado de 1º de ESO, en colaboración co Departamento de Lingua inglesa, imaxinou como serían as conversas de Whatsapp entre William Shakespeare e Miguel de Cervantes e expuxeron estas humorísticas “capturas de pantalla” nos taboleiros da entrada. En 3º e 4º de ESO o alumnado rendiu unha homenaxe á iniciativa da artista Nina Katchadourian, que deseñaba auténticos poemas a partir de títulos de libros. As mellores “lomopoesías”, que debían incluir algún título de Cervantes nos seus versos, foron escollidas para a decoración do frontal das escaleiras das distintas plantas do instituto. O alumnado de 1º de ESO D e B encargouse de debuxar unhas letras ben bonitas nesas bandas poéticas. Así mesmo, o Departamento de Lingua castelá propúxonos un reto colectivo: adivinar títulos de obras literarias a partires de emoticonas combinadas. A solución ó enigma desvelouse o venres, Día do Libro. O broche de ouro a todas estas actividades púxoo un concurso literario no que participou alumnado de 1º de ESO e que tivo como gañadores a Alicia Ama Ferreiro e a Sofía Llario Iglesias, de 1º ESO C. Os premios foron un lote de libros escollidos polo Departamento e dous vales para mercar na Casa do Libro. Moitas grazas a todos os que contribuistes para que este Día do Libro fose especial.