O 19 de decembro, o alumnado de 1º BAC A e B asistiu á charla “Que se fai na informática industrial?”. O obxectivo da charla era dar a coñecer os principais avances na informática industrial, desde a utilización dos computadores ata a impresión 3D, facendo ver como é posible que se deseñe calquera cousa utilizando unha computadora e seguindo o seu proceso ata que se fabrica con control por computadora., para sistemas industriais de control, visión artificial, internet das cousas (IoT), robots, etc. A charla foi organizada polo departamento de Orientación do instituto e o relator foi Manuel Pérez Cota, da UVigo.

O 18 de decembro, o alumnado de 1º BAC C e D asistiu á charla “A innovación na empresa: Os modelos de negocio na era dixital”. A innovación xoga un papel importante na empresa e no tecido económico pero, que é innovar? Que é un modelo de negocio innovador? Basta con ter unha idea orixinal ou unha tecnoloxía nova para innovar e pór en marcha un negocio? Que cambiou na innovación e nos negocios coa chegada da era dixital? A charla tratou esta temática analizando os novos patróns de innovación na empresa, os seus motores tecnolóxicos (internet, dispositivos móbiles, macrodatos (big data), a nube, etc.) de xeito ameno e con casos reais. A charla foi organizada polo departamento de Orientación do centro e o relator foi Emilio García Roselló, da UVigo.

O 12 de xaneiro tivemos no centro a visita de Daniel Fernández Carril. Daniel é o protagonista da curtametraxe “Mil sorrisos e un perdón” onde conta o accidente que sufriu cando tiña 18 anos por culpa dun home que conducía baixo os efectos do alcol. O accidente foi tan grave que perdeu unha perna e tivo que pasar por moitas operacións. Despois de ver a curtametraxe, o alumnado de 2º de Bacharelato tivo unha charla con el, na que falaron das secuelas do accidente e os perigos do alcol ao volante.

O alumnado de Ciencias de 2º de Bacharelato tivo a sorte de asistir a unha charla na que viron á aplicación das matemáticas e a enxeñería nalgunhas operacións de corazón. Hoxe en día pódese facer unha operación sen abrir a cavidade torácica nin ver o corazón de forma directa e para isto son indispensables a enxeñería e as matemáticas. O relator foi Marcos Loureiro García, profesor do departamento de Matemáticas. Marcos é doutor en Métodos Matemáticos e centrou a súa investigación en aplicar as matemáticas na cardioloxía. Creou un modelo que permite predicir o comportamento dos implantes aórticos de forma personalizada para cada paciente.

O 1 de decembro, o alumnado de Bioloxía e Xeoloxía de 1º de Bacharelato recibiu a visita de Dani San Román, responsable de divulgar o proxecto EDUCAMARES, que ten como obxectivo dar a coñecer os espazos Natura 2000 mariños. A charla-taller foi impartida para dar a coñecer o proxecto LIFE IP INTEMARES, salientando as principais ameazas, as estratexias de protección e a importancia da protección dos espazos mariños. Ademais o relator amosou mostras de especies de gran valor como posidonia, coral vermello, nacras, ósos de baleas e delfíns, … O proxecto EDUCAMARES conta co apoio da Fundación Biodiversidad do Ministerio para a Transición Ecológica y Reto Demográfico. A actividade estivo a cargo de Olga Mijón, profesora do departamento de Bioloxía e Xeoloxía.

CICLO DE ENCONTROS VIRTUAIS CON ESCRITORAS GALEGAS

Para pechar o ciclo de encontros con escritoras galegas organizado polo Concello de Vigo o alumando de cuarto escoitou con atención o que Eva Mejuto, escritora de libros tan lidos como 22 segundos ou Memoria do silencio, nos contou sobre as súas historias e sobre o mundo da transexualidade, onde se inspira o primeiro dos libros.

CICLO DE ENCONTROS VIRTUAIS CON ESCRITORAS GALEGAS

Continuando coas charlas do pasado curso de escritoras galegas organizadas polo concello de Vigo o venres 22 de outubro o alumnado de terceiro da ESO puido falar virtualmente con Iria Misa, quen nos falou da súa obra e do proceso da escrita, e deu pé para varias e interesantes preguntas da rapazada.

O alumnado de Ciencias da Terra e do Medio Ambiente participou na charla informativa e coloquio online do proxecto CLIMILLAT. O relator Alberto González, investigador coordinador do proxecto, vinculado á Fundación Matrix da Universidade de Vigo, expuxo os resultados dunha investigación pioneira sobre a realidade do cambio climático no Parque Nacional das Illas Atlánticas de Galicia e os concellos da súa área de influencia, concienciando da importancia de fomentar comportamentos sostibles co medio ambiente. Esta actividade foi organizada pola profesora do Departamento de Bioloxía e Xeoloxía, Olga Mijón Pedreira.

O Departamento de Bioloxía e Xeoloxía organizou unha charla virtual para o alumnado de 4º ESO B, C e D. A relatora, Sara Gamboa Jurado-Centurión, paleontóloga da Universidade de Vigo explicou de forma amena e didáctica as posibilidades que ofrece a ciencia para a "desextinción" de especies do pasado, desde os dinosaurios de "Jurassic Park" ata as posibilidades de traer ao mundo un mamut.

O alumnado de 2º da ESO tivo a sorte de participar nunha charla ofrecida pola Asociación para o Estudo da Lesión Medular Espiñal (AESLEME) en colaboración coa Dirección Xeral de Tráfico. Monitores da asociación, en cadeira de rodas como consecuencia dun accidente, impartiron unha sesión formativa sobre o efecto do consumo do alcol e as drogas en relación á condución de vehículos, sobre medidas preventivas e actuación en caso de accidente e consecuencias dos mesmos. A actividade estivo a cargo das profesoras do Departamento de Física e Química, Patricia Estévez e María de Álava.