Dentro do Plan Proxecta: Por 365 días de respecto e igualdade, do 6 ao 26 de maio tivemos no centro a exposición "Á VIOLENCIA DE XÉNERO...DILLE NON!". É unha exposición gráfica ilustrada, dirixida a axudar á mocidade a recoñecer, identificar e rexeitar condutas sexistas, nocivas nas súas relacións.

O 17 de maio celébrase o día contra a LGTBI fobia así que o día 18 celebramos a II festa da Diversidade nos recreos, onde repartimos pulseiras, calcomanías, fixemos un photocall e unimos as nosas mans para loitar por un mundo máis xusto

O alumnado de 4º ESO tivo un obradoiro sobre a desigualdade e a violencia de xénero na publicidade e nos medios audiovisuais. Falouse sobre os estereotipos e os roles de xénero que aparecen frecuentemente nos anuncios de xoguetes, perfumes, roupa,..., e o uso tanto do corpo das mulleres como dos homes como meros obxectos, a cosificación das persoas. Tamén se mostraron anuncios libres de estereotipos que, aínda que non son moitos, empezan a aparecer. Esta actividade está dentro do Plan Proxecta+ “Por 365 días de respecto e igualdade”

Coñecemos as mulleres que durante a historia foron importantes e moitas veces silenciadas? Para comprobarlo tivemos na entrada do instituto un panel con información de moitas delas e a súa silueta e ao cabo dunha semana descubrimos a súa foto e nome. A gañadora do concurso, despois dun sorteo entre as acertantes, foi Laura Sobral, de 1º de ESO C. Parabéns á gañadora e grazas por participar!!.

O 1 de febreiro o alumnado de 1º de Bacharelato asistiu a unha charla sobre a violencia machista nas relacións de parella. A relatora pertence ao centro de recuperación integral para mulleres que sofren violencia de xénero en Santiago e falou de como identificar sinais e comportamentos que acaban derivando en relacións tóxicas. Intentou facer reflexionar ao alumnado sobre a autoestima, o amor, o papel das amizades á hora de apoiar ás persoas que se atopan nunha relación deste tipo e de como intentar axudar a saír dela.

Con motivo do 8 de marzo, día da muller, tivemos varias exposicións e actividades no centro. Unha das mulleres que admiramos de 1º de ESO que organizou o Departamento de Plástica, outra de portadas de revistas e xornais que fixo o alumnado de 1º Bach e organizou o Departamento de Lengua e Literatura Española, outra de mulleres científicas de 4º da ESO organizado por Bioloxía, outra de mulleres relevantes organizado por Antropoloxía e finalmente o deseño e creación de pósteres conmemorativos do 8M realizado por alumnado de 1º Bach desenvolvido dentro do ámbito das TIC (Departamento de Tecnoloxía). Con todas elas aprendimos moito!.

Alumnado de 1º de Bacharelato foi esta semana polas aulas de 1º e 2º da ESO a ler textos con voz de muller en lingua galega, para facernos reflexionar sobre todo aquilo que non queremos volver escoitar ou como queremos cambiar o mundo. Coa literatura podemos aprender moito e até cambiar o noso xeito de pensar. Esta actividade organizouna Lingualízate e o Departamento de Lingua Galega.

Dentro do Plan Proxecta: Por 365 días de respecto e igualdade, o alumnado de 3º ESO tivo un obradoiro sobre a violencia de xénero e o novo contexto dixital. Falouse sobre os estereotipos e os roles de xénero que aparecen frecuentemente nos anuncios de xoguetes, perfumes, roupa,..., e o uso tanto do corpo das mulleres como dos homes como meros obxectos, a cosificación das persoas. Mostráronse anuncios libres de estereotipos pero polo de agora, na nosa sociedade, son os menos. Tamén recibiron información sobre o uso das redes sociais e a privacidade nas mesmas. Durante o mesmo aprenderon formas de configuralas e controlar quen pode acceder a súa información e falouse da importancia de ter coidado co que soben a internet. Durante o obradoiro tratouse tamén de diferentes formas nas que se exerce a violencia de xénero a través das redes.

Este curso botou a andar o novo equipo de Igualdade do Ies Rosais 2, formado por alumnado e profesorado, e prepararon varias actividades para berrar todos e todas xuntos un NON contra a violencia de xénero. Un NON feito coas nosas mans, unha alfombra con mensaxes machistas como símbolo de todo aquilo que queremos pisar e non volver escoitar, o nome das mulleres asasinadas neste ano da man das súas parellas e varios carteis feitos polo alumnado nas clases de debuxo. A intención de todo isto é que tomemos conciencia e tentemos eliminar dunha vez tanta violencia de xénero como hai.