Na semana do 18 de marzo inaugurouse no noso Centro, un ano máis, a “Feira do gravado”, actividade organizada pola profesora María Antonia Pascual, do Departamento de Plástica, coordinadora do seu alumnado colaborador de 3º e 4º de ESO.

Nesta actividade, que se leva xa realizando uns cursos, o alumnado confecciona planchas que posteriormente servirán para facer impresións sobre papel, e hai que dicir que o resultado é atractivo e mesmo en ocasións brillante. As cores e os deseños, desde logo, non deixan indiferentes.

Ata agora, dun xeito informal, víñase agasallando a algúns dos nosos visitantes con obras saídas deste “prelo” particular. A partir deste curso, e xa como algo institucionalizado, o alumnado realizará modelos dalgunhas planchas seleccionadas para, baixo a dirección da súa profesora, agasallar a conferenciantes e visitas con estas “probas de artista” tan ben recibidas e que a eles tanta ilusión lles fai. Por certo: animádevos, os artistas puxeron as súas obras ao baixísimo prezo de 2 euros!