ACTIVIDADE DE VOLUNTARIADO - BANCO DE ALIMENTOS

O 22 de novembro as alumnas Inés Bernárdez Rodríguez, Candela Castro Vilar, Noa Hernández Comesaña, Montserrat Llamazares Castro, Ainhoa Paz Oliveira, Laura Domínguez García, Ángela Caamaño Obertos, Lucía Fuentes Vila, Kira Ortigueira Heredero e Alba Pérez Collazo de 4º ESO, participaron nunha actividade de voluntariado para o Banco de Alimentos. A participación estivo organizada polo Departamento de Relixión.

A ESCOLA DE ARTES E OFICIOS - 130 ANOS NA HISTORIA DE VIGO

O alumnado de debuxo técnico de 2º bacharelato A, acompañado polo profesor Carlos García realizou a visita a Escola de Artes e Oficios co galo da exposición conmemorativa dos seus 130 anos de existencia. Ademais da exposición presentada polo historiador e comisario José Luis Mateo e por Rafael Ojea técnico do concello, tamén fixeron unha visita guiada coñecendo un taller e a biblioteca. A actividade estivo organizada polo Departamento de Educación Plástica e Visual.

MAGOSTO 2019

O xoves 14 de novembro celebramos o magosto, contribuíndo así a que o alumnado coñeza e valore as tradicións. No festexo o alumnado degustou castañas asadas, gozou de dezaseis xogos populares (trompo, solitario celta, labirinto de corda, aros, corda, poliedro estrelado, etc.) e actuacións de música tradicional galega. A actividade estivo organizada pola Vicedirección do centro e colaboraron o Departamento de Música, de Educación Física, e o Departamento de Tecnoloxía e a ANPA Agarimo.

EXPOSICIÓN ENL: "SORRISOS POR UN MUNDO. O HUMOR EN CARLOS CASARES"

A exposición que o ENL propuxo este mes no noso centro titúlase "Sorrisos por un mundo. O humor en Carlos Casares", en colaboración coa Fundación Carlos Casares. A través de plotters, achegouse ao alumnado información en relación co currículo que se imparte na materia de LGeL, xa que tanto no estudo das cantigas de escarnio e maldicir (3º ESO), como no coñecemento de Castelao (4º ESO), e nomeadamente na profundización da figura de Casares e a súa obra, de gran relevancia no derradeiro curso de bacharelato, a lectura e traballo proposto a partir dos cartaces foron de grande utilidade. A mostra repartiuse en diferentes seccións:

- Definición do humor, orixe e bioloxía.

-Teorías sobre o humor, estilos, tipoloxía e recursos humorísticos.

- Mapamundi sobre a orixe do humor en diversas culturas do mundo.

- Historia do humor en Galicia (tradición oral, cantigas de escarnio e maldizer, rexurdimento, a primeira idade de ouro, as décadas escuras, a renovación, a segunda idade de ouro e as primeiras décadas do século XXI).

- O humor de Carlos Casares.

- Unha visión humorística de Casares (desmitificar a figura seria de escritor mediante fotos de arquivo graciosas, caricaturas e humor gráfico).

SPELLING BEE 2020

Celebramos a primeira rolda do concurso de deletreo " Spelling Bee" 2020 o 13 de novembro de 2019 para elixir os representantes de 3º ESO que participarán na fase final. Participaron oito alumn@s de 3º ESO e resultaron gañadores: Carolina Cabeza Castro de 3º ESO B e Víctor V. Cameselle Celedoni de 3º ESO A. Parabéns aos gañadores! que serán preparados semanalmente polo Axudante Lingüístico, Giovani Santiago.

SEGURIDADE INFORMÁTICA

O ENL, en colaboración co servizo de NL do concello de Vigo, organizou para o nivel de 2º de bacharelato a actividade "Seguridade informática e hacking ético", celebrada o día 12 de novembro. O obradoiro centrou o seu contido na ciberseguridade e o que chamamos habitualmente hacking, ofrecendo aos asistentes a oportunidade de descubrir as medidas de seguridade que deben tomar cando utiliza un dispositivo electrónico e a importancia de preservar a nosa intimidade online. Durante a actividade, o alumnado achegouse ao concepto de hacking e aos tipos de hackers e técnicas de ataque máis habituais. Tras a exposición, comezou a parte práctica, onde puideron comprobar se as súas contas foran hackeadas, realizando as análises en tempo real. Ademais, o ponente ofreceu técnicas para protexer os nosos datos e abordaxe de páxinas canto menos curiosas, máis aló de que poidamos pensar que se atopan encriptadas. Unha actividade que motivou, informou e gustou moitísimo a todo o alumnado asistente.

TECENDO O FUTURO

O ENL, en colaboración co servizo de NL do concello de Vigo, organizou para o nivel de 2º de ESO a actividade "Tecendo o futuro", celebrada o día 6 de novembro. A idea partiu desde a conciencia de que cada día cobra máis importancia na nosa vida a tecnoloxía. E normalmente, cando pensamos en contornas tecnolóxicas programables, pensamos en complexos sistemas afastados da nosa vida cotiá. Sen embargo, desde este obradoiro tiñamos a seguridade de achegar o alumnado á tecnoloxía dunha forma diferente, traballando con dispositivos que se incorporarían en tecidos, chegando a crear o alumnado o seu primeiro e-téxtil utilizando placas Calliope Mini. A actividade comezou cunha aproximación teórico (que é un e-téxtil, cales son as súas bases técnicas, materiais necesarios e iniciación á programación de dispositivos electrónicos. Xa nunha segunda parte, o alumnado puido poñer en práctica o explicado, ao crear o seu primeiro e-téxtil que deu como resultado un piano de feltro con Calliope Mini. Resultou unha estupenda actividade para o alumnado deste nivel, que se motivou e participou grandemente nela.

CHARLA-COLOQUIO “EDUCACIÓN CÍVICO TRIBUTARIA”

O 11 de novembro o Xefe da Sección de Información e Asistencia ó contribuínte e de Certificados Tributarios D. Guillermo Surís Manzano, impartiu a charla-coloquio “Educación Cívico Tributaria” para o alumnado que cursa a materia de valores éticos en 4º ESO.

CHARLA-COLOQUIO “EDUCACIÓN CÍVICO TRIBUTARIA”

O 11 de novembro o Xefe da Sección de Información e Asistencia ó contribuínte e de Certificados Tributarios D. Guillermo Surís Manzano, impartiu a charla-coloquio “Educación Cívico Tributaria” para o alumnado que cursa a materia de economía en 1º bacharelato C e D.

ACTIVIDADES EDUCATIVAS NA ILLA DE CORTEGADA

O pasado día 23 de outubro o alumnado de 1º ESO realizou unha ruta interpretativa pola illa de Cortegada, pertencente ao Parque Nacional das Illas Atlánticas, acompañado polos profesores Sara González, Irene Otero e Raúl Matos. A actividade foi organizada polo Departamento de Bioloxía e Xeoloxía.

A visita comezou no porto de Carril dende onde os rapaces foron trasladados nunha embarcación á illa de Cortegada.

Durante a mañá, percorreron roteiros acondicionados polo interior da illa, visitando o maior bosque de loureiro do sur de Europa, e coñecendo tanto o resto da súa flora e fauna como a súa historia: os orixes da aldea, a posterior doazón ao rei Alfonso XIII e a recuperación para dominio público como parte do Parque Nacional das Illas Atlánticas.

Pola tarde, tras unha pausa para o xantar, realizaron xogos de temática educativa relacionados cos contidos aprendidos durante a mañá, tras o cal finalizou a visita. .