Xa está no aire "Galego, lingua mai", o traballo radiofónico realizado polo grupo de 1 ESO para Na Onda do Mella, co gallo do Día das Letras Galegas deste ano, no que se homenaxea a Francisco Fernández del Riego. Ademais, neste programa, o grupo participante, tanto o alumnado local como o estranxeiro, reflexiona sobre o uso do galego nas súas vidas coas súas familias...

Non o perdades!! #naondadomella #galegolinguamai #edlgmella

Ligazón ao programa: https://www.ivoox.com/na-onda-do-mella-7-galego-lingua-mai-audios-mp3_rf_107149613_1.html

Velaí unha instantánea da xornada de hoxe no río, na que o alumnado de 4º ESO realizou o roteiro de 4.3 km, onde puido descubrir unha gran diversidade de elementos xeolóxicos, etnográficos, naturais ou mesmo relacionados coa toponimia ou a tradición oral. A primeira parada da ruta foi no Barrio da Feixa, onde visitaron lugares como o Pozo da Serpe ou a central hidroeléctrica, para continuar entre as leiras da zona baixa de Cabral, ata a senda da parte alta do Lagares (Sello), onde recoñeceron algunhas das especies da flora e da fauna do bosque de ribeira galego e mesmo realizaron unha pequena acción ecoloxista facendo unha limpeza de plásticos. Para rematar a xornada da mellor maneira, a derradeira parada foi no Lavadorio Mariñeiras, no Sello, onde alumnado e profesorado lle botaron unhas cantigas como fin de festa...

Hai vida no Lagares!! #proxectolagares #edlgmella

Na mañá de hoxe realizouse a 2ª saída do Proxecto Lagares, percorrendo a pé a ruta de 4km que forma o trazado, na que participou o grupo de 1ºESO acompañados polo profesor e divulgador Xosé Couñago, que lles contou historias marabillosas acerca dos muíños, das serpes ou das mouras; ademais de repasar algúns aspectos de toponimia ou de etnografía, como os diferentes nomes do río Lagares ou as diferentes partes dos muíños galegos. A primeira parada foi no Barrio da Feixa, onde puideron descubrir a gran fervenza de 30 metros de altura e o Pozo da Serpe, unha das zonas con máis atractivo do río. Ademais, descubriron as historias da Fábrica "La Cristina", ao pé do río nesta mesma zona, que albergou diferentes usos, dende secadoiro de bacallao, ata fábrica de papel da que saíu o papel para a 1ª edición de Cantares Gallegos. A derradeira parada antes de volver ao noso centro foi na senda do Lagares da zona Cabral-Sello, na que se realizou un recoñecemento da flora e da fauna do bosque de ribeira, e rematou co Xogo da Descuberta, no que o alumnado tivo que realizar diferentes probas entre as que estaba a creación dun herbario ou unha pequena recollida de lixo... 

Durante o percorrido de hoxe puideron descubrir un Vigo diferente, o das vacas, ovellas, cabras, parrulos, coellos, melros, paporrubios, troitas, carpas...

Hai vida no Lagares!! #edlgmella #proxectolagares

Vídeo da saída en: https://www.facebook.com/100087907141771/videos/3461314297489448/

E chegan os novos Clubs de Lectura ao IES Ricardo Mella para os meses de abril/maio. A primeira quedada realizarémola na vindeira semana cos seguintes títulos:

• Club Adultxs: O libro negro da lingua galega, de Carlos Callón (28/4)
• Club Xuvenil: Plan de rescate, de Antía Yáñez (25/4)
• Club Igualdade: Un cesto de mazás, de Montse Fajardo (26/4)
• Club Manga: A proba de auga, de Anémona de Río (28/4)

Adiante coa lectura no IES Ricardo Mella! #edlgmella #bibliomella