Comité Lila

Na clase de Historia da Arte de hoxe, 8 de marzo, faltaban elas, as compañeiras en folga. Así que por elas, por xustiza e por coherencia histórica, Alejandro Bentley Blanco e Sergio Villar Díaz e a profesora Mirian Bouso Gallego decidiron denunciar as lagoas e as eivas do temario. Por un currículo igualitario que visibilice a todas e cada unha das mulleres artistas ao longo da historia, que foron, son e seguirán sendo moitas. As que non se nomean non existen!

Esta representación do poema "A xustiza pola man" foi organizada pola Comisión de Igualdade e o EDLG do IES de Ribadeo Dionisio Gamallo con motivo da celebración do Día de Rosalía de Castro.

GALERÍA DE IMAXES

Un ano máis, e a pesar das limitacións deste curso, o IES de Ribadeo quixo facer deste 25 de novembro un día de reivindicación co que denunciar as violencias machistas que seguen a producirse na nosa sociedade e co que implicar a alumnado e profesorado para avanzar na súa erradicación.

No tempo do recreo e ao longo dos días previos e posteriores, leváronse a cabo unha serie de accións, entre as que cabe destacar:

• Explicación introdutoria sobre a orixe desta data conmemorativa. Invitamos a toda a Comunidade Educativa a visitar o seguinte vídeo (Espora Consultoría de Xénero) no que Laura Viñuela explica o por que desta data: https://www.youtube.com/watch?v=ZhEUBc27Gm8&t=4s
• Lectura por parte do alumnado dos distintos TIPOS DE VIOLENCIAS, máis alá das agresións físicas, que son máis difíciles de detectar como a psicolóxica, económica e patrimonial, sexual e simbólica.
• Lectura de cuñas radiofónicas, emitidas nos días previos, coa temática da VIOLENCIA SEXUAL e do CICLO DA VIOLENCIA.
• Entrega de diplomas e premios ás/aos gañadores/as e finalistas do I Certame de deseños contra a violencia machista para máscaras.
• Coreografía do alumnado de 2º ESO.
• Berro final do lema da campaña promovida desde o CIM e o Concello: "QUE A VIOLENCIA MACHISTA NON CHE TAPE A BOCA. ALZA A TÚA VOZ".

·  

Os días 6 e 7 de febreiro de 2020, o alumnado da materia Coeducación para o século XXI e profesorado e alumnado integrante do Comité Lila do IES participaron no PROXECTO COEDUCATIVO "Eu tamén quero ser coma..." en colaboración co CIM de Ribadeo e os colexios da contorna, na Escola Municipal de Música e Danza.

Con esta actividade preténdese sacar á luz referentes femininos esquecidos, ocultos, descoñecidos, para que as nenas teñan aspiracións a ser o que lles guste e para que os nenos perciban que unha muller ten as mesmas capacidades que un home. O alumnado e o profesorado metéronse na pel destas mulleres e interpretaron o papel diante do alumnado dos colexios, dando así a coñecer a decisiva aportación destas mulleres á historia da humanidade. 

Os resultados deste fermoso proxecto poden verse na exposición de retratos que se inaugurou o 9 de marzo na planta baixa do IES, e nun vídeo que vén de publicar o Concello de Ribadeo. A través del poderedes viaxar no tempo e deleitarvos coas historias que vos traen dende a fotógrafa Ruth Matilde Anderson ata a ciclo-viaxeira Annie Londonderry. Un total de 17 mulleres, 17 vidas, 17 historias de superación.

Está dispoñible premendo na imaxe ou no seguinte enlace:

AS VIAXES NO TEMPO: Proxecto #EUQUEROSERCOMA. Concellería de Igualdade e CIM de Ribadeo.

Unha representación do Comité Lila visitou o venres 15 de febreiro o IES Xulián Magariños de Negreira. Covadonga Yanes,  Óscar Rodríguez Chus Colmenero e Teresa González explicaron o proxecto para o alumnado deste centro.

Foi unha xornada moi produtiva e agradable.

A Asemblea de Cooperación pola Paz colaborou cun taller de dinamización sobre igualdade.

Despois dun xantar colectivo, despedímonos  con ritmos de batuca e cantos.

                                                                                                            Mais imaxes