Blog da biblioteca

LIBROS INCLUSIÓN PLAN LÍA

Ven, 08/01/2021 - 15:27 — mirian

A consellería de Educación, dentro do Plan Lía de Bibiotecas Escolares, asignou ao centro unha partida económica para o chamado “desafío número 3”, A biblioteca inclusiva. Baixo este epígrafe preténdese dotar ás bibliotecas escolares dos recursos necesarios para atender de forma axeitada ao alumnado con necesidades educativas de apoio específico, ofrecéndolle oportunidades adaptadas e enriquecedoras para a adquisición e reforzo de habilidades e de competencias clave.

Velaquí unha fotografía do material adquirido:

XOGO “TRIBO”, UNHA BARALLA POLA IGUALDADE

Sáb, 19/12/2020 - 12:45 — mirian

A Concellaría de Igualdade de Ribadeo cedeu á biblioteca un exemplar do xogo de cartas “Tribo”, onde as protagonistas son mulleres senlleiras de todas as nacionalidades. A iniciativa parte do proxecto “Quero ser coma…”, que naceu coa finalidade de visibilizar as mulleres e os seus logros ao longo da historia, moitas veces ocultos ou silenciados. Colaborou na iniciativa o alumnado de 3º e 4º de ESO de Educación Plástica coordinado por Chus Colmenero e o alumnado de Coeducación, coordinado por Teresa González.

LIBROS SEMINARIO PERMANENTE DE EDUCACIÓN EMOCIONAL

Sáb, 19/12/2020 - 12:25 — mirian

20 membros do profesorado do instituto participan nun Seminario Permanente asociado á liña dos Contratos-Programa. Leva por título A educación emocional como eixe transversal da convivencia, a excelencia académica e a educación para a saúde. Como parte do material de traballo adquiríronse unha serie de libros relacionados co tema que pasarán a formar parte da nosa biblioteca.

EXPOSICIÓN PERMANENTE DE MINILIBROS

Sáb, 19/12/2020 - 12:22 — mirian

O primeiro trimestre deste curso 2020-2021 puidemos ver e admirar de cerca nunha exposición situada no vestíbulo principal do instituto: os “minilibros” realizados de xeito artesanal polo alumnado durante o confinamento, por iniciativa da profesora Rosa Paz Rico. Agora foron cedidos á Biblioteca, pasando a formar parte dunha exposición permanente. Polo de agora están situados no corredor que dá acceso á mesma, que funciona como unha especie de anexo para paliar a falta de espazo motivada polo protocolo anti-covid.

LIBROS FEMINISTAS EN INGLÉS

Sáb, 19/12/2020 - 12:12 — mirian

Ampliamos o noso fondo de libros con sete títulos en lingua inglesa vinculados dalgún ou outro xeito ao pensamento feminista.

FORMACIÓN DE NOV@S USUARI@S

Mér, 09/12/2020 - 15:01 — mirian

Coma todos os anos, este primeiro trimestre do curso 2020-21 tiveron lugar as Xornadas de Formación de Nov@s Usuario@s da Biblioteca para o alumnado de 1º de ESO. Iso si, coas restriccións impostas polo protocolo contra o Covid.

Desenvolvéronse en catro horas lectivas para cada grupo, tres delas na aula cos respectivos titores ou titoras e unha sesión práctica na biblioteca coa coordinadora. A través desta actividade adquiriron coñecementos sobre distintos aspectos da biblioteca: normas que rexen o seu uso e funcionamento, distribución do espazo, organización dos fondos, xestión a través de Meiga e, sobre todo, interpretación da sinatura dun libro como código que nos permite localizar e ordenar os exemplares nas distintas seccións. O obxectivo da actividade é formar usuarios que se manexen con total autonomía na biblioteca e saiban sacar partido de todas as posibilidades que ofrece.

A PALABRA DO ANO

Mér, 09/12/2020 - 14:34 — mirian

Queremos difundir unha iniciativa da Real Academia Galega e a Fundación Barrié animando a toda a cidadanía a participar na escolla colectiva da Palabra do Ano a través do Portal das Palabras, o proxecto de divulgación do noso léxico impulsado por ambas as institucións. Agardamos que a iniciativa sexa do voso interese e animávosvos a participar.

A primeira fase, a de recepción de propostas, permanece aberta ata o domingo 13 de decembro ás 23:59 horas nesta ligazón: https://portaldaspalabras.gal/palabradoano/

O luns 14 de decembro anunciaranse as palabras finalistas e abrirase o prazo de votación, que rematará ás 23:59 horas do venres 25 de decembro.

Podedes participar premendo na imaxe

CALENDARIO DE ADVENTO

Mér, 02/12/2020 - 13:40 — mirian

Queremos facernos eco dunha fermosa iniciativa desenvolvida dentro do programa europeo Naple Sister Libraries polas Bibliotecas Municipais asturianas de Castropol e Vega-La Camocha irmanadas con dúas bibliotecas croatas. Trátase dun calendario de advento moi cinematográfico onde cada día está asociado a unha película. Podes acceder a el premendo na imaxe. Iso si: debes agardar a que chegue o día correspondente para desvelar a sorpresa que agocha.

A ÁRBORE DA INCLUSIÓN

Mér, 02/12/2020 - 12:47 — mirian

Este Nadal a nosa árbore cede o seu espazo a libros da biblioteca que fomentan a inclusión, intentando desbotar os prexuízos contra todo o que se considera “diferente”. Cada un dos títulos escollidos leva un breve comentario referido ao seu contido, agardando despertar o interese pola súa lectura. A exposición amplíase con algúns títulos situados na sección de Novidades. Agardamos a vosa visita. Bo Nadal!