Varios

O venres 23 de abril, con motivo da celebración do Día do Libro, por iniciativa da profesora de Música María Ron a Biblioteca (cuxo equipo axudou a seleccionar os textos lidos)  foi escenario dun recital poético. O alumnado de 3º e 4º de ESO leu poemas nas distintas linguas do alumnado do centro con acompañamento musical en vivo e unha proxección audiovisual de fondo. O obxectivo, máis alá da mera celebración, foi o fomento da muliticulturalidade e a integración do alumnado de variadas orixes. Escoitamos textos en italiano, portugués, inglés, galego, castelán, alemán, catalán, chinés e árabe.

Renovamos a sinalización da biblioteca con 4 novos indicadores de itinerario situados en distintos lugares do instituto.

A Concellaría de Igualdade de Ribadeo cedeu á biblioteca un exemplar do xogo de cartas “Tribo”, onde as protagonistas son mulleres senlleiras de todas as nacionalidades. A iniciativa parte do proxecto “Quero ser coma…”, que naceu coa finalidade de visibilizar as mulleres e os seus logros ao longo da historia, moitas veces ocultos ou silenciados. Colaborou na iniciativa o alumnado de 3º e 4º de ESO de Educación Plástica coordinado por Chus Colmenero e o alumnado de Coeducación, coordinado por Teresa González.

Subscribímonos ao xornal O PAPAGAIO, tamén na súa EDICIÓN DIXITAL, pensando non só nun posible confinamento que oxalá non chegue, senón tamen na posibilidade de utilizalo nas aulas ou de acceder a el dende calquera dispositivo.

É un xornal para a xente nova ,impreso en papel reciclado e a cor, sen publicidade e con  periodicidade mensual. Ao longo das 12 páxinas que o compoñen trata temas de ciencia, ecoloxía, arquitectura, banda deseñada, literatura… Os contidos das seccións están supervisados por especialistas na materia e ilustrados por diferentes autores e autoras. O obxectivo é que o alumnado se interese pola ciencia, a ecoloxía, a historia ou a arte, entre outras disciplinas, dunha forma amena e divertida.

Para acceder a el preme na imaxe inferior e sigue as seguintes instrucións:

                          1. Preme na parte inferior en "Inicia a sesión aquí"

                         2. Escolle "Iniciar sesión con Google

                         3. Escolle "Iniciar sesión co teu e-mail"

                         4. Introduce os seguintes datos

                           E-MAIL: ies.ribadeo@edu.xunta.es

                       CONTRASINAL: opapagaio

O pasado trimestre parte do alumnado de Portugués asistiu a un encontro coa escritora Maria José Carvalho Areal na Biblioteca Municipal de Vila Nova de Cerveira . Tralo mesmo,a autora cedeu amablemente varios volumes do seu último libro Carro vermelho para o IES de Ribadeo e adicounos un dos exemplares.