Libros

NOVIDADES- O infinito nun xunco

Mar, 08/06/2021 - 13:38 — mirian

A convocatoria das Xornadas Plambe 20-21, ás que asistiu a coordinadora da biblioteca, pecháronse coa intervención maxistral de Irene Vallejo Moreu, doutora en Filoloxía Clásica polas universidades de Zaragoza e Florencia. Nas bibliotecas florentinas, rodeada de manuscritos, naceu o seu ensaio O infinito nun xunco, recoñecido con mútiples galardóns, entre eles o Premio Nacional de Ensaio 2020. Do disfrute do mesmo xorde o noso desexo de incorporalo á biblioteca e a encarecida recomendación desta lectura.

Como reza na súa contraportada “O infinito nun xunco”é un libro sobre os libros. Os libros e a súa historia, os libros e o seu nacemento, os libros e o seu impacto social. Irene Vallejo condúcenos a través dunha fascinante viaxe pola historia dos libros, ese asombroso artefacto que atravesou o espazo e o tempo [...] Ao longo de trinta séculos, a fabricación dos libros botou man do fume, da pedra, do barro, dos xuncos, da seda, da pel, das árbores e, finalmente, do plástico. Esta é unha abraiante aventura colectiva protagonizada por miles de persoas que ao longo dos séculos fixeron e protexeron libros: narradoras orais, escribas, iluminadores, tradutoras, vendedores ambulantes, mestras, sabios, espías, rebeldes, monxas, escravos, aventureiras, lectoras e lectores... “O infinito nun xunco” é un libro orixinal, entretido, erudito; unha alfaia literaria que se le coma unha novela”

No seguinte enlace podedes asistir á intervención da autora nos encontros:

https://www.youtube.com/watch?v=zq0-_nIvbJU

O prelo | O infinito nun xunco: vivirmos no relato - El Salto - Galiza

LIBROS ADICADOS

Mar, 08/06/2021 - 13:30 — mirian

O IES Ribadeo, como Escola Embaixadora do Parlamento Europeo, despediu maio cunha actividade moi especial: unha charla coa atleta olímpica Nary Ly. A raíz dela, a nosa colección de libros adicados enriqueceuse con “La historia de Nary Ly: superviviente, científica y atleta olímpica ”, impactante e inspirador testemuño persoal de loita fronte á adversidade, que indaga sobre como adquirimos coñecemento, motivación e habilidade para atopar saídas na vida. Segue os pasos da vida dunha nena que resistiu os horrores do infame réxime dos “ jemeres vermellos” de Camboia e atopou refuxio en Francia, onde saíu adiante ata lograr o seu doutoramento; traballou como científica especialista en prevención de enfermidades infecciosas e - sendo a primeira muller desa nación do sueste asiático en logralo- correu a maratón olímpica.

EXPOSICIÓN XELA ARIAS

Ven, 04/06/2021 - 10:34 — mirian

Entre o 31 de maio e o 4 de xuño temos no vestíbulo unha exposición sobre Xela Arias titulada Aquela nena de Sarria creada e xestionada polo colectivo Egeria . Podedes visitala de xeito virtual no seguinte enlace:

https://aquelanenadesarria.gal/gl

LIBROS IGUALDADE E INCLUSIÓN

Xov, 27/05/2021 - 12:09 — mirian

Continuando con noso desexo de fomentar a inclusión e a igualdade, incorporamos dous novos títulos á nosa sección de Literatura Feminista. Un deles é Cartas al señor A, da escritora polaca Anna Sakovicz, novela conmovedora e ao mesmo tempo chea de humor na que Anielka, a protagonista, lle envía cartas ao alzheimer para convencelo que que se aparte da súa avoa.

O segundo, Supremas. Mozas mitolóxicas, é un libro de Xan Eguía que selecciona para a mocidade as figuras mitolóxicas femininas máis destacadas -de onte e de hoxe- e os valores que as identifican, explicando, de paso, termos e conceptos como arquetipo, estereotipo, sororidade... de xeito sinxelo e ameno.

DICIONARIOS LATÍN

Mar, 25/05/2021 - 12:14 — mirian

A demanda do Departamento de Latín, adquirimos cinco dicionarios para as aulas co fin de repoñer os que xa estaban desgastados ou deteriorados.

LETRAS GALEGAS 2021- Libros Xela Arias

Mér, 12/05/2021 - 13:38 — mirian

Engadimos aos nosos fondos catro libros sobre a autora homenaxeada o Día das Letras Galegas cedidos pola Deputación de Lugo.

DOAZÓNS: Un hombre que se parecía a Cunqueiro

Mar, 11/05/2021 - 12:24 — mirian

A familia de José María Besteiro, recoñecido productor televisivo e xornalista nado en Riotorto (Lugo) agasallounos cun exemplar da súa obra Un hombre que se parecía a Cunqueiro, imaxinativo achegamento á figura cunqueiriana, á que Besteiro está unido por uns lazos familiares que forman parte dos seus mitos da infancia, o que lle dá pé a mesturar nas súas páxinas detalles sobre o autor coa súa propia biografía.

LIBROS AGASALLO CONCELLO

Xov, 29/04/2021 - 11:51 — mirian

O 20 de abril de 2021 a concelleira de cultura de Ribadeo fíxolles entrega ás directoras e directores dos centros de ensino de Ribadeo de varios exemplares de dous libros editados recentemente para que formen parte das súas bibliotecas.

O primeiro foi Cen historias máxicas pola Mariña encantada, de Antonio Reigosa, con ilustracións de Neira Brosch, editado por Gráficas Lar de Viveiro e patrocinado pola Área de Cultura da Deputación da Lugo. Trátase dun libro no que se recollen encantos, milagres, seres e lugares lendarios da comarca. O obxectivo foi contribuír á divulgación do acervo cultural e da creación artística da comarca en particular e de Galicia en xeral.

Ademais foron entregados dous exemplares de Rosas envaiñadas, un poemario do autor focense Paco Rivas.

O acto de entrega destes libros aos centros de ensino de Ribadeo tivo lugar na Biblioteca Pública Municipal El Viejo Pancho.

LIBROS ADICADOS- Pablo Trabadelo Villabrille

Xov, 29/04/2021 - 11:24 — mirian

O fisioterapeuta e poeta veigueño Pablo Trabadelo Villabrille adicounos o seu poemario Navalla, que pasa a formar parte da nosa colección Local. Podedes ver unha autopresentación do libro no seguinte enlace:

https://www.youtube.com/watch?v=XX0TC-aElao