Este 24 de abril celebramos o Día do Libro coa charla de Sabela Hermida, actriz e autora do libro María Casares fronte ao espello da editorial Xerais. A charla, organizada por Biblioteca e o EDNL, foi dirixida ao alumnado de 1° de bacharelato que se achegou así á importante actriz María Casares, símbolo do exilio e figura fundamental da cultura da segunda metade do século XX. Sabela Hermida agasallounos tamén cunha entrevista (levada a cabo polas alumnas de primeiro de bacharelato Mencía Qiu, Sofía, Irene e Silvia) gravada na radio. Sen dúbida foi un bo xeito de celebrarmos todo o que nos pode ofrecer un libro.

Podedes acceder á entrevista facendo clic no seguinte enlace. 

Se facedes clic no seguinte enlace, poderedes acceder á entrevista realizada a Noelia Míguez, autora do libro "Ocho señales", no que relata a súa vivencia como vítima de violencia de xénero. Na foto aparece o alumnado que a levou a cabo, xunto coa profesora Esther Quinteiro.

A profesora Esther Quinteiro, que coordina a Radio do instituto, organizou un obradoiro para explicar ao profesorado o seu funcionamento.

Na Semana da Radio o alumnado de 2º da ESO traballou a locución ante os micros para expresar diferentes sentimentos. Elaboraron microrrelatos onde o tema central eran as emocións: a tristeza, o amor, a perda dun ser querido, a rabia, a vergoña, a envexa, o medo...

O noso alumnado deixou levar a súa imaxinación e creou historias ben interesantes. Animádevos a oílas!

• Microrrelatos 2º A
• Microrrelatos 2º B

Neste 23 de febreiro celebramos o Día de Rosalía no instituto. O alumnado de 1º da ESO (na foto vemos a Adrián, Candela, Marina e Isabella) plantou unha roseira  conmemorativa e leu poemas da autora. A natureza e paisaxe son un motivo recorrente na obra de Rosalía de Castro, ben sexa cun valor simbólico, como a rosa, ou como expresión do galeguismo e dos sentimentos.

Tamén gravamos na Radio un podcast centrado en Rosalía e este aspecto temático da súa obra no que participou alumnado de 4º ESO (Antón e Leo) e 2º Bacharelato (Uxía e Eva).

Este xoves, 2 de febreiro, visitounos Xulia Alonso para charlar co alumnado de Psicoloxía de 2º de bacharelato sobre o seu libro autobiográfico Futuro imperfecto no que relata a propia experiencia da adicción á heroína e coa sida.Falounos do proceso de creación dunha obra tan emocional e honesta, das experiencias persoais e culturais que marcaron a súa xeración, dos tabús da enfermidade, da importancia de poder decidir. A charla organizouna Biblioteca, a profesora de Psicoloxía Mar Hospido e o EDNLG do centro.Tras o coloquio gravamos co equipo da radio unha entrevista que dirixiu a profesora Esther Quinteiro.

No arquivo adxunto tedes un audio feito polo alumnado de 1º ESO B, coordinados pola profesora Lorena Torrón, co gallo do Día da Paz.

Xa temos o primeiro programa ("Peticións polo ROU") do noso novo proxecto de radio. Que o gocedes!