IES Pedras Rubias

• Co fin de festexar o Nadal, difundir a solidariedade e promover a creatividade literaria, o IES Pedras Rubias convidou  seu alumnado a participar no Concurso de Nadal no mes de decembro.

  Podedes consultar as bases completas aquí.

  Premiouse a aula que mellor organizou a actividade atendendo aos  4 aspectos seguintes:

  ·  Decoración da aula.

  ·  Panxoliña de Nadal.

  ·  Conto de Nadal.

  ·  Mensaxes solidarias de Nadal.

  O premio consiste nunha xornada de xogos populares no Penedo Redondo con chocolatada o martes 22 de decembro.

  O xurado decidiu concederlle o premio á aula de 2º ESO D. Podedes ler o conto de Nadal que presentaron e tamén as súas mensaxes solidarias.

  Como a puntuación estivo moi igualada e o esforzo, implicación e traballo foi moi grande, concédense accésits ás seguintes aulas: 1º B, 1º C, 2º B, 3º D e 4º B.

  

  Noraboa a todos e todas pola implicación.

  Que teñades un bo Nadal!!

                                                                

•  

Este curso secundamos a iniciativa da VIII Andaina solidaria contra a violencia de xénero, implicando voluntariamente tanto a alumnado, coma a docentes e persoal da nosa comunidade. O evento foi organizado pola Secretaría de Igualdade da Xunta de Galicia e levouse a cabo os días anteriores e posteriores ao 25N (do 22 ao 30 de novembro).

Por mor da situación sanitaria non foi posible facer todos xuntos a andaina, senón que sumamos os quilómetros por separado: por un lado o alumnado na materia de Educación Física, e por outro o profesorado e persoal non docente nos seus lugares de residencia.

O pasado mércores 2 de decembro o alumnado de 1º B puido recibir por fin o premio por gañar o concurso do Magosto Terrorífico.

Tal como estaba previsto saíron andando ás 11.30 h. cara ao Penedo Redondo.

Primeiro houbo un tempo para tomar a merenda.

Ao acabar, gozaron competindo cos seguintes xogos tradicionais:

• Chave
• Aro

• Pincha
• Pai fillo nai

A final disputouse coa corda de soga tira.

Para rematar e deixar un bo sabor de boca antes de regresar ao instituto, entregóuselles un paquete de lambonadas.

Este ano a situación sanitaria non permitiu realizar a tradicional concentración de alumnado de Tui e de Salceda de Caselas que se vén realizando desde hai anos para homenaxear os Mártires de Sobredo, Cándida Rodríguez, Xaquín Estévez e Venancio González, asasinados por disparos da forza pública o 28 de novembro de 1922 no lugar de Sobredo (Guillarei), no contexto da loita antiforal.

Nesta ocasión só o Instituto de Estudos Agrarios organizou o pasado sábado 28 de novembro unha ofrenda floral íntima para conmemorar o 98º aniversario do asasinato dos tres veciños que loitaron contra a fin dos foros.

Desde aquí tamén o IES Pedras Rubias quere renderlle homenaxe virtual, esperando poder facelo presencialmente o curso que vén.

A alumna Noelia Cabaleiro Rodríguez de 4º de ESO resultou gañadora no 3º Certame Imaxes para o Patrimonio de Recollida de Fotografías do Patrimonio Inmaterial Galego-Portugués.

O alumnado que quixese participar neste concurso de Ponte nas Ondas debía buscar, na compaña dos seus familiares, aquelas fotos que contivesen elementos do patrimonio inmaterial galego-portugués. Debían completar a participación no certame coa inclusión dun texto explicativo da imaxe. 

A imaxe coa que Noelia obtivo o accésit é esta:

E o texto é o seguinte:

Cando se comezaron a facer os primeiros “botellóns”?

Nesta imaxe de 1961 aparecen un grupo de mozos, entre eles está o meu avó Manuel Cabaleiro e o seu irmán Francisco Cabaleiro (os da dereita de todo), gozando dunha das romarías máis famosas de Salceda de Caselas, a subida ao penedo de San Cibrán. O meu avó cóntame que subían andando ata o penedo, detrás das distintas procesión que o facían dende as parroquias da contorna; ía moita xente, pero sobre todo mozos e mozas. Alí pasaban todo o día. Aproveitando a romaría, os rapaces e rapazas levaban comida, e sobre todo viño branco, viño tinto, augardente, licor café… Tamén había gaiteiros que tocaban e amenizaban a festa e os grupos de mozos e mozas que alí se xuntaban porque daquela aínda non había radios portátiles para que os grupos puidesen escoitar música. Con todo isto os grupos de rapaces e rapazas podían pasalo ben e divertirse, a foto non deixa lugar a dúbidas, e segundo me din tamén sempre había algún mozo que acababa un pouco prexudicado polo viño. E así era como a xuventude se relacionaba entre ela. Agora que o penso, non se vos parece un pouco isto a algo que fai a xuventude de agora? Aí deixo a pregunta.

Todas as imaxes gañadoras poden visualizarse ao completo na seguinte ligazón: http://pontenasondas.org/iii-certame-de-fotografia-imaxes-do-patrimonio-as-ganadoras/

 Nas anteriores edicións do Certame a entrega dos premios facíase nun acto presencial con representantes de todas as escolas, pero este ano, debido á incidencia da pandemia nas nosas vidas, a Xunta Directiva da Asociación tomou a determinación de non facelo así e enviar os premios co nome dos gañadores/as ao enderezo da escola para que alí se faga a entrega. 

Aproveitamos para comunicarvos que xa se convocou o IV Certame de Recolla de Imaxes do Patrimonio para o presente curso 2020/21. Proximamente publicaranse as bases que rexerán esta nova edición.

Noraboa, Noelia e familia! Toda a comunidade do IES Pedras Rubias séntese moi orgullosa de ti. Déchesnos luz nesta noite escura e longa que estamos a vivir. Agardamos que sigas a recoller premios na túa traxectoria e tirando bonitas fotos coa nova cámara fotográfica que recibiches de premio por parte de Ponte nas Ondas! 

A Consellería de Educación pola Orde do 6 de novembro de 2020 regula a distribución de máscaras entre o alumnado.

Podes consultar a convocatoría AQUÍ.

Podes ver un resumo da convocatoría no ADXUNTO desta publicación.

Para conmemorar o día das Bibliotecas, o Día das escritoras 2020, que este ano xa fixo a súa quinta edición e que tivo lugar o luns da pasada semana baixo o lema “O esforzo cotián das mulleres”, e inaugurar as emisións de radio durante os recreos, o xoves 29 de outubro durante o recreo e a hora de lecer alumnado de diferentes niveis educativos leu poemas e fragmentos narrativos de escritoras galegas durante o programa especial de radio.

As lecturas escollidas foron as que seguen:

·         Un poema do libro Feliz Idade de Olga Novo, homenaxeada co Premio Nacional da Crítica Española en Poesía (María 2º D).
·         Un fragmento narrativo de Mª Xosé Queizán do libro Amor de tango (Lúa 2º D).
·         Un poema de Marta Dacosta do libro Na casa da avoa (Ainhoa 2º D).
·         Un fragmento de Adiós María de Xohana Torres (Naia 1º B).
·         Un fragmento da novela Nena e o mar de Érica Esmorís (Karina 1º B).
·         Un parágrafo de Memoria do silencio de Eva Mejuto (Maruxa 1º E).
·         O poema “A xustiza pola man” de Rosalía de Castro (Lucía Fernández 1º B).

Agradecémoslle a axuda técnica recibida por parte do profe Rubén e de Alba de 3º A, sen os cales non sería posible facer esta actividade.

Agardamos que fose do voso agrado e gozásedes tanto coma nós. Ata a próxima!!

Ao departamento de Lingua Galega e Literatura non o para nin a Covid-19!

Un curso máis organiza e dálle continuidade ao concurso de relato curto.

Se queres concultar as bases completas, podes facelo premendo en cartel.

Nesta ocasión os relatos do mes de outubro debían comezar polo polo final do libro María Vinyals. Un talento rebelde da escritora Isabel Blanco, isto é: "Agora que sabedes que estou aquí, quedo moito máis tranquila. E espérovos.”

Se o que desexas é coñecer os relatos gañadores do mes de outubro, preme en cada un dos cursos seguintes:

1º B

1º C

2º D

3º D

4º C

Moitas grazas a todos e todas as que participastes e noraboa aos gañadores/as.

A seguir a participar!!

Xa está establecido o sistema de Préstamo de Libros da Biblioteca adaptado ás normas sanitarias.

Xa podes reservar libros! Consulta o procedemento AQUÍ.

Adxuntamos instrucións en relación coa Renovación dos membros do Consello Escolar.                                  (Premer sobre 1 adxunto)