IES Ramón Otero Pedrayo

Onte rematou novembro, Mes da Ciencia, pero as actividades científicas seguen no IES Otero Pedrayo. A nosa Biblioteca, coa colaboración doutros departamentos (nomeadamente o de Bioloxía, nesta ocasión), aínda ten programados retos científicos (terceiro nivel), exposición de proxectos feitos por alumnas de 1º BAC (gañadoras de importantes premios en cursos pasados), ademais de prolongar a exposición sobre libros de ciencia en galego e castelán ou a exposición Mulleres científicas da Universidade de Vigo: "Quero ser cientíifica".

Despois de todo, quedan reflexións interesantes no aire como: A reivindicación da ciencia en galego non debería ir acompañada da impartición das aulas das materias que se consideran máis científicas tamén en galego?

 

 

 

 

A "mocidade" do Centro Interxeracional a Farixa, que xa son familia do IES Otero Pedrayo, visitou hoxe pola mañá o noso centro. O alumnado máis pequecho tíñalles preparadas unhas pezas musicais no Paraninfo, logo visitaron o noso museo e, por último, acabaron na biblioteca, onde presentamos o libro que estamos a ler este trimestre no club de lectura, no que eles tamén van participar.

Que marabillosos son estes encontros interxeracionais. Canto temos que aprender dos nosos maiores!

 

 

O pasado martes, un grupo de docentes do colexio de Carmelitas, agora en `estado de xúbilo´, visitaba o Otero Pedrayo para coñecer o noso Museo Pedagóxico, pertencente á rede MUPEGA.

Grazas pola visita; sempre é unha honra pór en valor e dar a coñecer o noso patrimonio, o patrimonio de todos e de todas.

 

O alumnado de 4ºA está a traballar, como Proxecto competencial, na importancia da reciclaxe para a conservación do planeta. Pequenas accións poden traer grandes beneficios. Neste marco, visitaron a marabillosa Expo De Polo a Polo, no Xardín do Posío, actividade de proximidade que nos abriu unha fiestra a un mundo natural agochado do ser humano. Preguntas, debate, crítica... Fóra das aulas tamén se aprende! E moito!

 

 

Hoxe a prensa faise eco da participación do Otero Pedrayo no programa Educando en Xustiza. En tres sesión distintas, todo o alumnado de 4º ESO tivo a oportunidade de presenciar varios xuizos en directo, nunha das salas do Xulgado do Penal de Ourense.

A maxistrada, Susana Pazos, antes de comezar a sesión, dáballe detalles ao alumnado sobre o xuízo que ían ver, explicándolle a función de cada un dos axentes que intervirían nel e abrindo rolda de preguntas para que os nosos rapaces e rapazas non quedaran con ningunha dúbida.

Ao final, aínda tiveron oportunidade de visitar os calabozos e a sala de recoñecemento no soto do edificio, que os deixou realmente impactados.