IES Muralla Romana Centro de ensino en Lugo (Spain). Ciclos de FP, BAC e ESO.

GALA "ENREDANDO CO GALEGO"

O mércores 12 de xuño desfrutamos da gala final da iniciativa "Enredando co galego”. En primeiro lugar, Grande Amore animou o público asistente. A segunda parte da gala consistiu nun sorteo de 2 lotes de libros e unha tableta por instituto. No noso caso, foron afortunados/as Yago de 2ºA, Narges de 3ºB e Sofía de 2ºB.

Por último,o xurado destacou a variedade de traballos presentados: relato breve, podcast, conto, poemas, vídeos, composicións plásticas...que se publicaron nas redes sociais co cancelo #enredandocogalego ou na páxina web da AELG. O terceiro premio foi para Celia Rodríguez de 1º BAC, o segundo para Sara Pico de 1º BAC e o gañador foi Eric de 2º ESO B polo relato "Ola, son Pedro". Ademais, o xurado destacou os textos de Martín Vila "Cantiga de amigo", os poemas de Yasmin e o podcast recomendando unha lectura de Violeta, tres estudantes de 4ºESO.

Parabéns polo voso compromiso e pola vosa creatividade!

2º POSTO CONCURSO NACIONAL PROGRAMA-ME

Os alumnos Marcos Montaña, Adrián Valdés e Aaron Yáñez, do ciclo superior en Desenvolvemento de aplicacións multiplataforma acadaron un magnífico segundo posto no concurso de programación competitiva Programa-me (https://programame.com/) celebrado en Madrid o pasado 7 de xuño.

Participaron un total de 188 equipos de 79 centros distintos de toda España polo que o segundo posto é moi meritorio. Tamén foron o primeiro equipo en resolver un problema na fase final.

Na entrega de premios e diplomas, Marcos Montaña tamén recibiu o premio e o recoñecemento de todos os asistentes por ser o gañador do concurso nacional “Las 12 uvas” celebrado o pasado 31 de decembro na categoría de alumnos de segundo curso de ciclos formativos.

GAME JAM MURALLA 24

*Información

RESUMO DA XORNADA DE ORIENTACIÓN PROFESIONAL NO IES MURALLA ROMANA

O pasado 15 de maio, celebrouse por primeira vez no IES Muralla Romana,unha Xornada de Orientación Profesional co lema “Embárcate na FP. Diríxete ao teu soño".

Esta xornada tiña entre os seus obxectivos:

■ Poñer en valor o traballo realizado durante o curso polo alumnado dos ciclos formativos das tres familias profesionais compartindo o seu coñecemento e saber facer co alumnado doutros niveis formativos (ESO e 1ªBacharelato).
■ Fomentar a interacción dos distintos niveveis formativos do centro, favorecendo que o alumnado de secundaria coñeza a formación postobrigatoria do IES Muralla Romana e mesmo que o propio alumnado das familias profesionais coñeza o labor doutros compañeiros/as cos que comparten instalacións.
■ Fomentar o traballo interdisciplinar, de xeito que o alumnado se dera conta do papel que cada materia das que reciben docencia ten na vida profesional e tamén facendo posible que prosesorado de diferentes áreas de coñecemento se coordinara para acadar este obxectivo común.

A experiencia resultou moi enriquecedora e satisfactoria. O alumnado mostrouse moi motivado no desenvolvemento previo e tamén durante a realización do propio día da xornada. Asemade, a implicación do profesorado que participou confeccionando e dirixindo os diferentes obradoiros que se plantexaron para mostrar a realidade da formación profesional do IES Muralla Romana fixeron posible que a Xornada acadara os obxectivos antes citados.

Parabéns a todo o alumnado e profesorado polo seu traballo e dedicación.

Ler máis

"ESCAPE GAME" EN FRANCÉS

O día 3 de maio o alumnado de francés de 3°ESO participou nun "jeu d'évasion" (escape game) en francés, na biblioteca do noso centro escolar. Un avatar creado por unha IA foi o punto de inicio do xogo.Tiveron 2 horas para resolver, de xeito colaborativo, crebacabezas de moitas clases. Atoparon unha morea de elementos coma falsos libros, lámpadas de luz ultravioleta, lupas vermellas, cadeados con segredos ocultos, mensaxes codificadas, códigos policromáticos, etc. E por suposto, tiveron que resolver enigmas en francés. Para rematar o reto, lograron abrir unha maleta de dobre fechadura no tempo acordado e recuperaron o premio! Dende logo, a lingua francesa abre moitas portas!

VISITA DO IES NOTRE DAME D´ELBEUF( NORMANDIE)

O día 31 de maio, o alumnado de francés de 3°ESO, 4°ESO e 1° BACH acolleu con moita emoción os rapaces franceses do IES Notre Dame d'Elbeuf (Normandie), que acaban de chegar a Lugo para facer prácticas en empresas. O noso alumnado encargouse da visita guiada, en francés, dos puntos máis salientables da cidade. Gozamos do paseo nun día solleiro e compartimos experiencias. Foi, sen dúbida, o comezo dunha enriquecedora relación intercentros.

MESA REDONDA: "A MOCIDADE, O FUTURO DO GALEGO"

O pasado 15 de maio as alumnas de 1º de BACH, Sara Pico e Carla Gómez foron convidadas pola asociación Rente Ao couce de Becerreá a unha mesa redonda que levaba por título: "A mocidade, o futuro do galego. Iniciativas pola lingua na infancia e xuventude".

Na mesa redonda participaron representantes de Semente (Escolas de Ensino Galego), de Familias polo Galego (A Mesa pola Normalización) ademais das nosas alumnas que foron expor a nosa experiencia como centro de ensino na iniciativa Aquí tamén se fala, como naceu, con que obxectivos, como foi a experiencia no noso centro e deixaron tamén moi claro que a nosa mocidade aposta polo galego e por estas iniciativas normalizadoras que loitan contra tantos prexuízos lingüísticos. Podemos dicir que tivemos unha gran e acertada representación neste coloquio sobre o galego e a mocidade.

VISITANDO A ALLIANCE FRANÇAISE E O MUSEO NACIONAL DA CIENCIA E TECNOLOXÍA (MUNCYT)

O alumnado de francés de 3°- 4º ESO e 1°de BACH foi á Coruña descubrir o edificio da Alliance française & o Muncyt. No centro de lingua e cultura francesa, asistiron a unha presentación moi interesante sobre os exames oficiais do DELF & DALF xogando en francés para practicar a expresión oral.
Máis tarde, no Muncyt, ademais de subir nun avión, de ver a exposición do labirinto adicada ao cerebro e á parte de invencións, fixeron unha xincana sobre ciencia cun apartado especial en francés sobre as invencións francófonas. A experiencia resultou moi positiva, volcáronse na participación e completaron as actividades como bos detectives científicos.

FONDO SOLIDARIO DE AXUDAS PARA ADQUIRIR MATERIAL ESCOLAR. ALUMNADO MATRICULADO EN ESO, CURSO 2024/25

No DOG do luns, 20 de maio de 2024 publícase a Orde do 7 de maio de 2024 pola que se regula a participación no fondo solidario de libros de texto e axudas para a adquisición de libros de texto e material escolar. (Texto da convocatoria)

Prazo de solicitude: do 21/5/2024 a 21/6/2024, incluídos

As solicitudes presentaranse preferiblemente por vía electrónica a través do formulario normalizado (ED330B - anexos I e II) accesible desde a sede electrónica da Xunta de Galicia.
Opcionalmente, poderán presentarse presencialmente nos centros docentes ou en calquera dos lugares e rexistros establecidos na normativa reguladora do procedemento administrativo común.
Os solicitantes das axudas deben cubrir unicamente os anexos I e II do procedemento ED330B e presentar a documentación necesaria.
Os anexos para a súa presentación presencial tamén poden descargarse neste enlace: Anexos I e II en pdf.

Ligazón a FondoLibros (Na páxina de Inicio atoparás información detallada, por exemplo: resumo do fondo e axudas, prazos establecidos na convocatoria, preguntas frecuentes...)

INFÓRMASE QUE NO CURSO 2024/25 O CENTRO ESTÁ INCLUÍDO NO PROXECTO DE EDUCACIÓN DIXITAL (E-DIXGAL) PARA TODOS OS CURSOS DA ESO. O alumnado destes cursos está excluído da participación no fondo solidario de libros de texto e das axudas para adquirir libros de texto. Non obstante, terá dereito á axuda para adquirir material escolar, se reúne os requisitos establecidos na orde.

LEMBRANDO A LUÍSA VILLALTA: LETRAS GALEGAS 24

Comezamos a semana das Letras con actividades na Biblioteca. O luns realizamos a actividade "Deconstruíndo a Luísa Villalta", con recortes de versos da autora para crear novos poemas expostos na cortiza, ademais duns lapbook realizados por 2º ESO B. Ó día seguinte, no lecer, tivo lugar un Kahoot sobre a biografía da homenaxeada, que gañou o equipo de Walid, Malena e Moraima.

O 15 de maio, desfrutamos dun recital-concerto en homenaxe a Luísa Villalta, puidemos escoitar poemas da autora da man de alumnado de 1º, 2º e 3º ESO, con música interpretada por Violeta Fraga Sal de 4º ESO B ó saxo e Carlos do ciclo DAM ó piano.Neste acto recitáronse partes das obras O oco da palabra, Música reservada, En concreto e Ruído.

Como peche, os presentadores reivindicaron a nosa lingua non só neste mes, senón os 365 días do ano.