IES Muralla Romana Centro de ensino en Lugo (Spain). Ciclos de FP, BAC e ESO.

PRESENTACIÓNS DE TRATAMENTOS ESPECIAIS EN IMAXE PERSOAL

O día 30 de outubro tivo lugar nos talleres de Imaxe Persoal a presentacion dun tratamento de xesoterapia corporal, a cargo da empresa Bruno Vassari, ofrecendo unha liña de cosméticos para peles irritables e intolerantes a cosméticos, que promocionan como un tratamento integral, coidando a pel e tendo en conta a persoa no plano espiritual e emocional.

Para finalizar estas sesións de formación, o día 3 de novembro sería a formadora, nacional e internacional, da casa de cosméticos Germaine de Capuccini, quen daría a coñecer un tratamento especial, a base de distintos ácidos, combinado con aparatoloxía para eliminar manchas corporais.

VISITA A EXPOURENSE

Visita realizada polo alumnado de 2º curso do Ciclo Superior de Asistencia á Dirección o día 2/11/2023 a Expourense, con motivo da 24ª edición da Feira Internacional Xantar, na que puideron comprobar de xeito práctico a realización dun evento corporativo, presenza de stands, transmisión da imaxe corporativa das empresas, etc.

XOGOS NO MAGOSTO

O pasado martes 31 o alumnado de 1º de ESO desfrutou dunha entretida xornada organizada polo Equipo de Convivencia, na que participaron, coa axuda do profesorado, en varias actividades ao aire libre, xogos no pavillón e no patio, kahoots do Samaín na biblioteca e para rematar, que mellor ca un MAGOSTO!!

Preme nas imaxes!!

O SAMAÍN DO MURALLA ROMANA

O Muralla Romana converteuse nun lugar especialmente arrepiante estes días: arañas, esqueletes, bruxas, sartegos, contos de medo, música horripilante… encheron a biblioteca e os corredores. Todo grazas ao alumnado da ESO, que non se espanta con nada e ten unha enorme creatividade. Especial mención merecen os gañadores dos concursos de contos de terror e de “scary box”: Daniel Iglesias e Aitana Ron. Grazas a todos/as!

Se premes nas imaxes veralas mellor!!

GALICIASKILLS 23-IMAXE PERSOAL

O 25 de outubro o alumnado de 1º e 2º do Ciclo Medio de PECOCA (Imaxe persoal) desprazáronse ata a localidade de Silleda para participar na exhibición que os alumnos/as participantes, na competición de GaliciaSkills 23, ofreceron ao alumnado de ciclos formativos de toda Galicia dentro da familia de imaxe persoal.

Coa presenza do Conselleiro de Educación, Román Rodríguez González e da Directora Xeral de Formación Profesional, M.ª Eugenia Pérez Fernández ,Galiciaskills 2023 pretende darlle unha maior proxección e difusión á formación profesional que se imparte en Galicia.

*para ver mellor as imaxes preme nelas

FESTA DO MAGOSTO 31 OUTUBRO

24 DE OUTUBRO: DÍA DAS BIBLIOTECAS

Con motivo da celebración do día das bibliotecas queremos compartir convosco unhas imaxes da nosa biblioteca. Coa colaboración do alumnado de ASIDIR, o equipo da biblioteca organizou unha actividade de formación de usuarios: o alumnado de 1º da ESO descubriu como funciona a biblioteca e os fondos e recursos que esta lle ofrece. Pero tamén queremos inculcar neles o amor polo libros e a lectura.

* Para ver mellor as imaxes preme nelas.

EN MARCHA PARA O CORRELINGUA!!

Como adianto do Correlingua, o pasado venres día 20 de outubro o alumnado de 2º ESO puido participar na redacción do seu manifesto a través do obradoiro "Desata a lingua" coa escritora Ana Carreira.
En primeiro lugar, a autora leu o manifesto do curso anterior que levaba o título "Na casa, na escola, bota a lingua fóra!". A continuación, os grupos de traballo escolleron imaxes e frases de inspiración para redactar algúns puntos para o próximo manifesto. Despois de escribilos, terían que colocar as imaxes, frases e as súas creacións nunha cartulina.
O resultado deste obradoiro xuntarase cos realizados noutros centros galegos e lerase no Correlingua, que terá lugar na terceira avaliación polas rúas de varias localidades e ao que asistiremos.