PONTEVEDRA VILA DE PONTES
Grazas ás actividades organizadas polo concello de Oleiros, o alumnado de 2º ESO tivo a oportunidade de coñecer a cidade de Pontevedra acompañado por uns monitores que axudaron a ver e interpretar moitos elementos que, doutra maneira, posiblemente pasarían desapercibidos.
A visita comezou cun paseo pola cidade vella, en que puidemos apreciar como mellora a calidade vida tras un proceso de peonalización das rúas. A continuación, visitamos o Museo de Pontevedra e fixemos fincapé tanto nas salas dedicadas a Castelao como no tesouro de Caldas, un importantísimo achado da nosa prehistoria. A seguinte parada estivo no Centro de Interpretación das Torres Arcebispais, onde descubrimos as sorpresas que garda o subsolo da zona histórica da cidade.
Tras unha visita rápida á basílica de Santa María dos Mareantes e comer uns bocadillos á beira do río Lérez, dirixímonos á área arqueolóxica da Caeira, xa no veciño concello de Poio. Alí observamos diversos grupos de petróglifos e cavilamos sobre o simbolismo destes fascinantes gravados rupestres.
