ROTEIRO DA MULLER

Primeiramente, dicirvos que esperamos que vos atopedes moi ben, con ánimo e pensando en positivo. 

 

A semana anterior, antes de irnos de vacacións, deixámosvos desconectar dos recreos creativos, coa finalidade de que tivésedes menos actividades, dado que non queremos atafegarvos desde o EDLG con máis traballo, recordade, esta actividade é para axudarvos a desfrutar de actividades do EDLG desde o lecer creativo, é como un recreo desde a casa, non son deberes, co cal podedes facelo en calquera momento ao longo da semana ata o xoves que vén e despois enviarnos ese traballo feito, se queredes, ao cal vos animamos, que seguro que quedan marabillosos eses traballos, o que si é seguro é que serán realizados con moito entusiasmo e agarimo, como cando estabamos no centro. 

Estes 20 minutos de recreo desta semana consistirán nun roteiro, relacionado coa muller, un roteiro que se comezou a organizar nas aulas relacionado co Plan Proxecta de innovación en dinamización lingüística e con terceiro da ESO. Hoxe nós imos facer unha parte do que se realizou na aula recordando á muller con el e partindo de casas de mulleres escritoras e outros lugares de referencia.

 

A proposta é:

 

 

1) Prepara o material necesario para tomar nota: lapis, goma, lapis de cores, acuarelas e pincel..., aquilo que vexas que vai axudar a mellorar o resultado, porque imos trazar en papel o roteiro.

 

2) Primeiro partiremos da Casa de Rosalía de Castro, na cidade vella, e moi preto da Praza da Fariña, a actual Praza de Azcárraga. Marcamos este punto no roteiro e poñemos o nome de Rosalía de Castro, debuxamos a imaxe de Rosalía ou a dun libro dela, o que queirades, senón debuxadas en letras bonitas as do nome da escritora.

 

3) Despois trazamos unha liña en direccion á Casa de Francisca Herrera, ao lado da de Rosalía e, aproveitamos a marcar esta parada de camiño á Praza da Fariña. Aquí escribimos o nome con letras bonitas e debuxamos algo que identifique a Francisca Herrera, se podemos, senón o nome.

 

4) Trazamos outra liña desde o punto anterior e baixamos da Praza da Fariña á Real Academia Galega, na rúa Tabernas.

Aquí debuxamos a porta co indicativo de Real Academia Galega.

 

5) Trazamos unha liña desde a Real Academia Galega, ten nome feminino, e cómpre facer unha parada aquí para lembrar a todas as mulleres escritoras e a todas as mulleres, despois debuxamos o porto da Coruña, para refrescarnos co mar e os barcos, despois trazamos outra liña cara aos Cantóns e paramos diante da escultura de Emilia Pardo Bazán, debuxamos a escultura ou, con letras bonitas, poñemos o nome de Emilia Pardo Bazán, rodeada de árbores.

 

Este roteiro pretende facer un percorrido pola nosa cidade para ademais coñecela, o roteiro da muller, e podedes incluír aquelas mulleres que queirades cando rematedes este roteiro, a idea é poder viaxar desde a casa, cando o rematedes podedes telo de man para pasear desde a casa cando precisedes. 

 

Esperamos que sigades ben.