De carácter científico/histórico

A SÚA ORIXE

Na actual praza de abastos de Redondela, calquera persoa hoxe pode mercar peixe, carne, froita... Pero antano, a venda destes produtos estaba en lugares distintos na nosa vila. Así, o peixe podía mercarse nunha construción coñecida como “A Ribeira” situada ao pé do embarcadoiro dun dos nosos ríos, o Alvedosa, (aínda hoxe en día é habitual escoitar dicir á xente maior “Vou á ribeira que hoxe teño ghana dunhas lorchiñas”). Noutra construción coñecida como “A Praza de Abastos”era onde se podían mercar legumes, froitas e outros produtos; estaba ubicada nos terreos que habitualmente ocupa o concello. E nesta mesma praza, pola parte de atrás e contra o río, vendíanse carnes frescas. Ademais, había unha especie de cobertos, coñecidos como alfóndigas, nos que se vendían grans (de feito, temos nun destes sitios a chamada “Praza da Alfóndiga”).

Parece ser que o vello mercado foi inaugurado en 1891, pero as malas condicións destas instalacións fixeron que as autoridades encargaran un proxecto de mercado e matadoiro público no ano 1926. A construción da actual praza de abastos está moi unida ao encauzamento do río Alvedosa e á construción do novo edificio do concello.

Así, nos anos 40, decidiuse que o sitio idóneo para a Casa do Pobo era onde estaba situada A praza de abastos. Daquela, o concello decide mudar de sitio estes locais alimenticios e, no ano 1946, decídese que o lugar idóneo para a construción da praza é uns terreos situados na marxe esquerda do río Alvedosa e próximos ao piar do viaduto de ferrocarril alí ubicado.

Con todo, foron varios os problemas que non permitiron que a construción desta edificación se sacase a subasta ata anos máis tarde, en 1952. E os problemas continuaron durante varios anos, pois habería que agardar ao ano 1955 para que a obra estivese practicamente concluída, edificio no que hoxe se poden mercar froitas, carnes... e, sobre todo, peixe (que é o que agora a nós nos ocupa).

Información sacada dos artigos “A praza de abastos de Redondela: intrahistoria dunha construción” , escrito por Rosa Mª Glez. Carballás e Manuel Bouzas Escudero e “Arquitectura rexionalista do concello de Redondela”, ambos os dous publicados no boletín nº 6 (2009-2012) do SEMINARIO DE ESTUDOS REDONDELÁNS (SEREN).

Imaxes de produtos mariños que se venden na praza de abastos de Redondela

Acedías	Ameixa babosa	Ameixa rubia
Bacaladiños-Lirios	Bacallau	Bucareos
Cabracho	Calamares	Cariocas, pescadiñas e monxas
Castañeta	Centolo	Chinchos
Choco	Croques ou berberechos	Dourada
Escarapota	Escarpón	Fanecas
Linguados	Navallas	Nécora
Patelos	Peixe sapo ou Rabada	Raia
Rapantes	Rincha ou Cabala	Xurelos