Ligazóns importantes

Emails do profesorado Horarios de atención a nais e pais

2014/2015

23 de abril: Día do libro

Lun, 27/04/2015 - 16:28 — admin

O xoves, 23 de abril, celebramos no noso centro o “Día do libro”. Polas paredes da cafetería e polas escaleiras de acceso ás clases , alumnos e alumnas da ESO do noso instituto deixaron constancia do libro que máis lles gustou ou o que máis lles impactou. No tempo do recreo viñeron á Biblioteca onde foron agasallados e agasalladas cun fermoso marcapáxinas.

Preme na foto para velas todas

30 DE XANEIRO: "DÍA DA PAZ"

Sáb, 31/01/2015 - 20:13 — admin

Premede aquí verdes o folleto coa guía con propostas lectoras e audiovisuais que a nosa Biblioteca elaborou co gallo do "Día da paz" .

Premede aquí para verdes o folleto con algunha mostra poética que a nosa Biblioteca recolleu co co motivo do "Día da paz".

ENCONTRO COA ESCRITORA ELENA GALLEGO

Vie, 16/01/2015 - 19:31 — admin

Rematamos o primeiro trimestre cun encontro coa escritora Elena Gallego, autora das novelas que leron rapaces e rapazas do noso centro: Dragal. A herdanza do dragón (3º ESO) e Sete caveiras (4º ESO).

O noso alumnado agardaba impaciente este encontro coa escritora, pois eran moitas as preguntas que querían formularlle e tamén querían amosarlles os traballos que sobre destas dúas obras súas realizaron.Por exemplo, Claudia e Rocío explicaron quen era o verdadeiro asasino de Sete caveiras, Uxía recolleu as opinións da clase a respecto da obra e transmitiullas á autora. Pablo, Alba e Anais explicaron en que consitira o traballo que realizaron sobre Dragal…

A verdade é que foi un encontro moi interesante e divertido. E iso que os “medios informáticos” non responderon ben.

Preme na foto para velas todas

LECTURA PÚBLICA DE TEXTOS LITERARIOS

Vie, 24/10/2014 - 18:51 — admin

Tal e como xa sabedes, o venres, día 24 de outubro, conmemoramos o “DÍA DA BIBLIOTECA”. Unha das actividades realizadas foi a lectura pública e individualizada de textos literarios de diferentes autores/as e de distinta temática.

O acto tivo lugar na zona de lectura informal da nosa biblioteca. Os/as que participaron neste acto foron agasallados/as cun medallón de chocolate. Porque xa sabedes… a lectura é un goce para os ollos, a mente , o corazón e… o padal.

Velaquí fotos de participantes neste acto: preme en

Imaxes

DÍA DAS BIBLIOTECAS ESCOLARES

Vie, 24/10/2014 - 07:56 — admin

A nosa biblioteca, en colaboración coas bibliotecas de Redondela levará adiante, a partir, do venres 24 de outubro ata o 28 de novembro, unha actividade na que se intercambiarán libros por alimentos e produtos de primeira necesidade (que se destinarán a Cáritas Redondela).

Libros solidarios é o lema desta campaña, na que participan as bibliotecas municipais, a biblioteca do Círculo Cultural Recreativo de Chapela e as bibliotecas dos CEIP de Quintela, Santo Paio de Abaixo, Alexandre Bóveda, Laredo, do CEP Santa Mariña e dos IES Chapela e do noso, o Mendiño, que son así mesmo os lugares de intercambio. E tamén colaboran a Biblioteca do CEIP San Salvador de Teis, a Fundación Filomena Rivero Alonso e ?El Patito Editorial?.

A campaña rematará o 28 de novembro ou ata que se esgoten as existencias. Queremos aproveitar para convidar a todas aquelas persoas que queiran sumarse a esta iniciativa, cambiando alimentos non perecedoiros e produtos de hixiene, tanto persoal como para o fogar, polos libros que encontrarán expostos no noso centro. Os visitantes collerán o libro ou libros do seu interese e deixarán a cambio os produtos nos recipientes colocados para tal efecto.

Amais disto no tempo do recreo (de 11:00 h. a 11:30 h.) na zona de lectura "informal" da nosa biblioteca, se realizará unha lectura pública de textos de libros tirados da nosa biblioteca.

Xa que logo, LER, GOZAR E SER SOLIDARIOS/AS.