O Instituto de Ensino Secundario Mendiño está situado na vila de Redondela. Atópase nunha antiga xunqueira que formaba parte das marismas de Redondela. Está, polo tanto, en terreos gañados ao mar. O enderezo completo é IES Mendiño, avenida Mendiño Nº 40, Redondela, Pontevedra.
O IES Mendiño está nestas antigas marismas que actualmente se converteron na área de equipamentos públicos de Redondela.Na mesma zona están un colexio de primaria, outro instituto da ESO, o centro de saúde, a comisaría de policía, a confraría de pescadores e a casa do mar. Nesta mesma zona, celébrase a feira de Redondela os días 6 e 21 de todos os meses, coñecidas en toda a comarca pola gran afluencia de persoas que acoden a ela.
Estamos situados, polo tanto, ao norte do centro urbano de Redondela, nun edificio de tres volumes rectangulares, conectados entre si. O volume principal consta de planta baixa e dúas plantas e atópase comunicado cos outros dous. No segundo volume está a vivenda do conserxe e no terceiro a sala de usos múltiples e a biblioteca.
O aspecto exterior é dun edificio rectangular de baixo e dúas plantas revestido de morteiro monocapa de color granate.