2013/2014

A véspera da Festa da Coca, día 18 do mes de san Xoan, reuníronse os membros do club de lectura “Quiosco Cocó” para teren o último encontro literario do curso. Nesta ocasión o libro a tratar foi Némesis de Philip Roth, unha novela que foi do agrado de todos os participantes desta terulia, mais que varias persoas coincidiron en destacar unha sensación de inquedanza e tristura que lle produciu o final da historia.

Un libro que conta como a poliomelite mudou o curso da vida deses personaxes que pululan pola historia, nun tempo de insoportable calor que resultou ser narrado de tal xeito que, nos días nos que o libro foi lido: días tamén de moita calor, creou nos lectores e lectoras unha sensación de agobio.

O día 24 de abril volveuse reunir o noso club de lectura “Quiosco Cocó” para comentarmos a novela de Vázquez Montalbán Los mares del Sur. Aproveitamos a ocasión para falarmos de literatura, de política, de sociedade… e mesmo de actualidade: a morte de Adolfo Suárez, que nos serviu –do mesmo xeito cá novela lida-  para xunguir importantes acontecementos que unha vez máis vencellan pasado e presente.

O seguinte libro escollido foi Rúa, un conxunto de relatos escritos por Miguel Torga  Quen poida, que o lea en portugués. Máis información no faceboock da nosa biblioteca Mendilibros.

CLUB DE LECTURA “ QUIOSCO COCÓ”

IES Mendiño

Curso escolar 2013-2014

“O verbo ler non soporta o imperativo, igual ca amar ou soñar.”
                                               DANIEL PENNAC

E como estamos de acordo con isto, o que nós facemos só é convidarte, animarte, convocarte a que leas con nós, unha vez ao mes.

SOMOS un grupo de persoas (pais, nais, alumnado, profes, persoal non docente) interesadas na lectura lúdica e compartida, participando do coñecemento, da imaxinación e doutras realidades e mundos.

XUNTÁMONOS na biblioteca do IES Mendiño despois de

FACERMOS unha lectura individualizada dunha obra literaria para despois

FALARMOS das nosas impresións sobre a lectura que vimos de facer, cambiamos impresións sobre a mesma. Discutimos, ás veces, se non estamos de acordo, rimos, escoitamos, mesmo pode ser que

COMPARTAMOS a sesión con algún invitado/a (se a lectura escollida nolo permite -autor/a, crítico/a, tradutor/a,...) e tamén

XANTAMOS e BEBEMOS en compañía porque ben sabemos que non hai festa sen comida e, en definitiva, o que nós facemos é unha pequena festa da lectura.

Se estás interesado/a en compartir esta festa con nós, anota os teus datos no baixo da folla . Non te comprometes máis ca a asistir cando che apeteza.

A información sobre as lecturas e datas de reunión saberalas polo teu fillo/a, vía correo electrónico ou ben a través do noso facebook Mendi Libros ou a web do centro www.edu.xunta.gal/centros/iesmendino.

Haberá exemplares da obra a ler á túa disposición na biblioteca do centro.

Un saúdo lector

Xabier Míguez, Coordinador da Biblioteca do IES Mendiño.