Conferencias

O pasado 22 de maio o doutor Roberto Iglesias, coordinador do Grao de Robótica e profesor do departamento de Electrónica e Computación da Escola Politécnica Superior do Campus de Lugo, impartiu unha amena e didáctica conferencia ao alumnado de primeiro curso de STEMbach.

Nesta conferencia, titulada robots cada vez máis “cerca” das persoas, o doutor Roberto Iglesias, comezou cautivando o alumnado e docentes presentes na sala explicando que a proximidade ás persoas é tanto dende o punto de vista do “hardware” (ofrecendo un número de servizos cada vez maior: agricultura, inspeccións estruturais, asistentes domésticos,…), coma do “software” (como é a intelixencia artificial xenerativa). Explicou o funcionamento das redes neuronais artificiais para o control intelixente, os grandes retos actuais da robótica (aprendizaxe continuo e federado) e as bases da intelixencia artificial xenerativa.

Álbum: Sen categoría -> 24 robotica

Este mércores 8 de maio o Doutor en Matemáticas David Gómez Castro, e investigador "Ramón y Cajal" na Universidade Autónoma de Madrid, impartiu unha conferencia web á que asistiron alumnado de primeiro curso de STEMBach e o profesorado do noso IES no salón de actos do noso instituto.

O profesor explicou dun xeito matemático o fundamento da probabilidade de obter un tipo de interés, as accións, as opcións, os fundamentos das carteiras de inversión e os intereses TIN e TAE entre outros termos financeiros habituais no mundo no que vivimos, chegando a presentar algoritmos similares aos que usan os bancos na actualidade, non moi distantes dos empregados por algún premio Nobel en finanzas.

Álbum: Sen categoría -> 24 matematicas financeiras

Este 12 de marzo o alumnado de primeiro curso de STEMBach asistiu a unha conferencia de bioética impartida polo Doutor en Ciencias da Saúde pola UdC Jonatan Miguel Carrera e polas médicas residentes Julia Aboal Alonso e Natalia Pérez Rodríguez. Tamén asistiron a este acto alumnado de Psicoloxía e profesorado do IES Lucus Augusti.

Nesta interesante ponencia presentáronse feitos coma os experimentos en seres humanos realizados por médicos con persoas en Auschwitz, o estudo Willowbrook nos Estados Unidos, a bomba atómica de Hiroshima e o experimento de Tuskegee en USA. A petición da poboación fóronse lexislando recentemente os conceptos da ética e xurdiron os comités de bioética actuais. A conferencia rematou cunha conversa sobre temas de bioética actuais como a modificación xenética de humanos, a eutanasia e o aborto.

Álbum: Sen categoría -> 24 bioética