Economía

• Descrición das calidades persoais e as destrezas asociadas á iniciativa emprendedora, analizando os requisitos de distintos postos de traballo e actividades empresariais.
• Toma de decisións sobre o itinerario vital propio comprendendo as posibilidades de emprego, autoemprego e carreira profesional. Relación do anterior coas habilidades persoais e as alternativas de formación e aprendizaxe ao longo da vida.
• Actuación como futur@ traballador/a responsable coñecendo os seus dereitos e deberes como tal, valorando a acción do Estado e da Seguridade Social na protección da persoa empregada, e comprendendo a necesidade de protección dos riscos laborais.
• Creación dun proxecto de empresa na aula e descrición das características do mesmo: Relación co contorno, función social, elementos que constitúen a súa rede loxística (provedores/as, clientela, sistemas de produción e comercialización, redes de almacenaxe,...), etc
• Documentación empresarial e a súa importancia como fonte de información sobre a empresa.
• Simulación de actividades de produción e comercialización propias da empresa proxectada, aplicando técnicas de comunicación e traballo en equipo.
• Descrición das formas xurídicas das empresas en relación coas esixencias de capital  e coas responsabilidades legais ligadas á propiedade e á xestión.
• Estudo das fontes de financiamento das empresas, valorando as máis axeitadas para cada circunstancia e tipo de empresa.

Economía da Empresa trata de centrarse nun determinado e determinante suxeito económico: a empresa. Procura explicar o fenómeno económico da empresa e, tamén, achegarnos ás actuacións sobre ela para alcanzar certos fins.

A empresa é un protagonista esencial da actividade económica, encargado da produción de bens e servizos para satisfacer as necesidades da nosa sociedade. Nesta materia falamos da razón da existencia das empresas, das súas características, dos tipos de organización que poden adoptar e do seu funcionamento, sen esquecer os factores que inflúen na toma de decisións.

A materia emprega un enfoque de presentación baseado na análise das distintas áreas e funcións da empresa. Como resultado diso, estrutúrase nos bloques seguintes:

1. "A empresa", no que se describen os seus elementos, as súas funcións e os seus obxectivos.
2. "Desenvolvemento da empresa", onde se fai unha análise das decisións de dimensión e localización, e das estratexias de crecemento.
3. "Organización e dirección da empresa", no que se explica a planificación, a organización e a xestión dos recursos da empresa.
4. "A función produtiva", para analizar os procesos produtivos e a estrutura de ingresos e custos derivada deles.
5. "A función comercial da empresa", que repasa as principais decisións da empresa na comercialización dos seus produtos e/ou servizos.
6. "A información na empresa", para comprender a importancia de contar con datos e información relevante e precisa na toma de decisións e no cumprimento das obrigas fiscais.
7. "A función financeira", onde se trata de analizar os aspectos salientables das decisións de investimento e financiamento na empresa.

Dentro da materia tamén hai unha serie de supostos prácticos relacionados cos  bloques anteriores e con un peso dun 50% na nota (mesmo peso que a parte teórica). Non son necesarios coñecementos matemáticos elevados para a resolución deses supostos prácticos.

A empresa ten unha gran relevancia social, producindo bens e servizos tamén crea valor engadido e emprego, canaliza e reparte renda, e relaciónase cos traballadores, cos clientes, cos provedores e co seu entorno social e medioambiental. O desenvolvemento da actividade empresarial e a acción d@ empresari@ deben estar guiados pola responsabilidade social e o comportamento ético, máis aló da procura duns resultados. Todo iso sen esquecer a creatividade e o espírito de innovación, a elaboración de reflexións persoais e a toma de decisións fundamentadas, e a idea do erro como fonte aprendizaxe e progreso.