Equipo de Dinamización da Lingua Galega

O 12 de xuño tivo lugar a festa do evento Enredando co Galego organizado polo Concello de Lugo e do que o noso centro é asiduo participante. Nesta ocasión, ademais, temos que destacar o compromiso dunha parte moi significativa do noso alumnado aprol da promoción do uso da lingua galega que queremos seguir escoitando no noso barrio por mil primaveras máis.

No acto estivo presente a sensación musical do panaroma galego, o techno-rockeiro do Valadouro Grande Amore, facendo visible a presenza do galego nas vangardas musicais.

Parabéns aos gañadores/as e ata o ano que vén que seguiremos enredando co galego!

Un ano máis, o noso centro participa nesta campaña da Asociación de Escritoras e Escritores en Lingua Galega (AELG), en colaboración coa Área de Cultura, Turismo e Promoción da Lingua do Concello de Lugo.

Durante os vindeiros 21 días, o estudantado destes dous centros poderá participar en dúas experiencias distintas: unha inmersión lingüística, compartindo nas redes sociais as súas reflexións sobre o proceso ou unha experiencia de creación literaria e artística, na que deberán crear obras literarias en galego en formato escrito e dixital, e deberán enviala á Escola de Escritoras e Escritores da AELG. As rapazas e rapaces que participen entrarán no sorteo de material electrónico e varios lotes de libros de literatura galega, ademais de distintos Agasallos.

A presentación da campaña contou cos poetas Samuel Merino e Silvia Penas, e de cara ao final da iniciativa, a área de Cultura e a AELG organizarán unha actividade na que as e os participantes poderán realizar un intercambio de experiencias e desfrutar de varias actuacións en directo.

O alumnado foi convocado as 11h do pasado 7 de maio e encheu o Salón de Actos sacrificando o seu período de lecer para facer parte desta iniciativa en favor da normalización da lingua galega no noso instituto e nas nosas vidas. Un orgullo para o Equipo de Dinamización que dará visibilidade ao compromiso acadado a través da súa canle de Instagram @leirantes.

O 17 de xaneiro tivemos a honra de contar no Salón de Actos cun dos grupos teatrais máis afamados e premiados do panaroma galego: Talía Teatro.

A obra A Parábola do Angazo foi representada para o alumnado de 4º da ESO polos actores Artur Trillo e Toño Casais coa colaboración do seu equipo técnico. Queremos agradecer que se prestaran tan xentilmente a partillar coa rapazada uns minutos posteriores á obra e respostar as súas preguntas. 

A actividade foi promovida polo EDLG do centro e pretende achegar unha ollada á situación pasada e presente da lingua galega e, facendo uso do humor e a retranca, situala como lingua válida e de futuro para todos os ámbitos.

Unha honra contar con profesionais deste nivel para un fin tan necesario como a promoción e normalización da nosa lingua entre o alumnado.

O día 23 de febreiro celébrase o Día de Rosalía e no noso centro o Equipo de Dinamización da Lingua Galega en colaboración cos departamentos de Xeografía e Historia e Lingua e Literatura Galega decidiron celebralo cun roteiro dirixido ao alumnado de 3º da ESO polos lugares rosalianos da nosa cidade.

Retrato de Rosalía de Castro pola coordinadora do EDLG Belén Martín

Alumnado 3º ESO A e B no mural do CEIP Menéndez Pelayo

Alumnado de 3º ESO C e D ante a estatua de Rosalía no parque que leva o seu nome

Rosalía Sempre

Como xa contamos nun post anterior, polo Leiras pasa xente fantástica que acaba deixando dunha maneira ou doutra a súa pegada.

Así o fixo Noemí García, profesora de Lingua e Literatura Galega no noso centro educativo durante o curso 20-21, co seu proxecto Galego para Boomers, que consistiu na elaboración por parte do alumnado dos primeiros cursos da ESO dun dicionario para facilitar o acceso dos Boomers (persoas nadas no Baby Boom) ao novo vocabulario utilizado pola xuventude.

O proxecto foi premiado durante o curso pasado polo Concello de Lugo e tivo unha grande repercusión mediática e nas redes sociais.

Este ano recibiu un novo premio, o Mil Primaveras, outorgado pola Coordinadora de Traballadores/as de Normalización da Lingua, que recoñece a Galego para Boomers como o mellor proxecto de fomento do galego entre a infancia e ou a mocidade do ano 2021. Un grande orgullo para o noso centro vernos envoltos nesta festa da lingua.

Moitos parabéns ao alumnado que participou no proxecto e a Noemí por facernos ver como sociedade que a lingua galega é unha lingua válida en todos os ámbitos, mesmo para comprender e explicar a realidade máis actual descrita, as veces, con indescifrables neoloxismos.