11F: Día Internacional da Muller e a Nena na Ciencia 2024
Este ano co motivo do 11 de febreiro, data na que a ONU enmarcou esta efeméride, desde o Equipo de Igualdade e Diversidade do IES Leiras Pulpeiro puxemos en marcha varias actividades e propostas de participación para o noso alumnado.
Por unha parte démoslle continuidade a iniciativa que arrancou o ano pasado a profesora Noemí Vázquez que consiste na elaboración de currículums de mulleres científicas por parte do noso alumnado desde diferentes materias, así como o photocall que de forma voluntaria tanto eles como elas, caracterizadas da científica escollida, brindan unha homenaxe ao traballo desa muller. Non podemos estar máis contentas co resultado, e aquí unha mostra que tamén se pode ver no corredor da planta baixa do centro.
Por outra banda e uníndonos ás actividades en colaboración con diferentes universidades para dar visibilidade a mulleres na ciencia, tivemos a Lourdes Lorenzo García, directora do Departamento de Tradución e Lingüística e Coordinadora de prácticas da Facultade de Filoloxía e Tradución, da Universidade de Vigo. A charla foi dirixida ao alumnado de 4ºESO e foi unha sesión de concienciación sobre a importancia da inclusión a partir das tecnoloxías da fala como a subtitulación para persoas xordas, audiodescrición para persoas cegas e adaptación á lectura fácil para persoas con discapacidade intelectual, e así achegar un traballo no que conflúe o coñecemento humanístico e o científico por mulleres, na súa gran maioría.
