O venres 26 de novembro tiveron lugar no noso centro educativo unha serie de actividades ao redor das I Xornadas de Sensibilización coa Discapacidade no Deporte organizadas polo club CB Xuncas Diversia.
Xuntouse unha excelente representación de deportistas con discapacidade que viñeron acompañados do ex-capitán do Breogán Salva Arco, colaborador habitual dos movementos sociais da cidade.
O alumnado de 1ºC, 2ºC e 2ºD puido experimentar, guiados por un monitor, o que é xogar ao baloncesto cunha cadeira de rodas e aproveitar a presenza de Salva Arco para tirar uns tiros con el.
O alumnado de 3ºC asistiu a unha charla impartida por Álvaro Illobre, tenista paralímipico campión de España. Álvaro preside, ademais, o club de baloncesto Abeconsa Basketmi e veu acompañado do seu mellor xogador, o polaco Karol Szulc. Na segunda parte da charla incorporouse Ionut Preda o paralímpico viaxeiro, 25 veces campión de España en varias modalidades para discapacitados e podium galego absoluto en Halterofilia. Unha persoa chea de forza física e mental que nos demostrou como non hai barreiras que paren o esforzo, o traballo e a ilusión.
Na hora de lecer, Salva Arco deu un paseo polo patio onde non parou de asinar autógrafos e tirar fotos co noso alumnado.
Unha xornada que nos deixou unha fonda pegada, feita realidade grazas ao CB Xuncas e á colaboración do profesorado de Educación Física e das titoras de 2ºC e 2ºD, onde vimos exemplos magníficos de superación persoal que nos contaxiaron a súa sensacional vitalidade para seguir adiante con enerxías renovadas neste curso escolar.
