2008/2009
O IES Lamas de Castelo, desde o Equipo de
Dinamización e Normalización Lingüística e en colaboración co Dpto. de
Lingua Galega e Literatura, está a organizar un traballo de recolla de
alcumes das casas do concello de Carnota co fin de rexistrar este
patrimonio inmaterial e fomentar no alumnado o respecto e promoción
cara a estes alcuños que aínda hoxe se manteñen vivos como sinais da
nosa identidade.
O alcume ou alcuño é un sobrenome, usado en troques
do nome e, moitas veces, máis coñecido que o mesmo nome. En Galiza hai
unha longa tradición de alcumes, e poucas deben ser as familias que non
o teñen ou tiveron; moitas veces está referido a unha particularidade
da persoa ou da familia, sendo posible un derivado do lugar de
nacemento, característica física, a profesión do pai ou da nai etc.
PASOS PREVIOS:
Elaboración dun plano aéreo do concello de Carnota a partir das imaxes do sixpac.
Distribuír en zonas todo o alumnado do Centro (1ºA, 1ºB, 2ºA, 2ºB, 3ºA, 3ºC e 4º).
Escoller un coordinador/a de zona e dar as directrices para poñer en marcha o proxecto.
LABOR DO COORDINADOR/A:
Combinar co grupo e dividilo por áreas atendendo ao lugar de residencia.
Elaborar un mapa por área e entregárllelo aos compañeiros para que numeren as casas e poidan comezar a recoller información na ficha correspondente.
Informar os compañeiros/as acerca do traballo que deben
desenvolver, isto é, recoller os alcumes das casas e a súa (posíbel)
orixe.
O coordinador/a fixará unha data de recollida da documentación recompilada polo grupo.
Facer un baleirado de datos na táboa.
ENTREGA DO TRABALLO:
Os colaboradores deben entregar os mapas numerados, as fichas de recollida de información e as táboas.
O traballo debe entregarse antes do 7 de marzo de 2009.
Os departamentos de Ciencias Naturais e Lingua Galega imos o martes 31 de marzo a Padrón. A excursión será co alumnado de 2º e 3º da ESO e alí visitaremos o Xardín Botánico e a Casa da Matanza, Casa Museo de Rosalía de Castro.
Para que vaiades abrindo boca, aí tedes algunha foto do que imos visitar.
Casa da Matanza Xardín Botánico
Coa intención de dar a coñecer o noso patrimonio inmaterial os alumnos
e alumnas de 1ºB, 2ºA e 2ºB, 3ºA e 4º deberedes facer un traballo de
campo para recoller e gravar información acerca do "Día de Defuntos" ou
do rito de "Sacar o aire".
Logo de escoller a persoa que ides entrevistar
(preferiblemente xente de avanzada idade) debedes elaborar un guión
coas preguntas que lle queredes facer. Concertades unha cita e
explicádeslle que é un traballo de recollida de datos para o Centro e
pedides permiso para gravar.
Unha vez rematada esta fase debedes facer un resumo
por escrito do contido da gravación e enviala por correo electrónico ao
Centro.