O pasado día 7 de febreiro os alumnos de 2º de Bacharelato da materia "Métodos Estatísticos e Numéricos" visitaron o Instituto Galego de Estatística. Onde lles explicaron as súas funcións e puideron coñecer algunhas das aplicacións da materia vista ao longo do curso.
O departamento de bioloxía e xeoloxía organiza un concurso fotográfico para todo o alumnado que participou na saída á Escola de Enxeñaría de Minas e Enerxía da Universidade de Vigo e ao parque natural MONTE ALOIA. A nosa biblioteca escolar, BibliotecaRebolo, colabora nesta actividade na que solicitamos a eses alumnos que compartan con todos nós como foi a súa experiencia. O único que teñen que facer e enviar algunha das fotos que fixeron ese día no parque natural á dirección de correo electrónico bibliotecarebolo@gmail.com. Sinxelo, non?
Pero, se tes algunha dúbida, podes consultar toda a información neste enlace.
De feito o prazo para participar empezou xa o día 3. Que estades esperando? Ao último día?
A ANPA "Fonte da Vella" organiza coa colaboración do IES Isidro Parga Pondal o III Ciclo de charlas para as familias.
As charlas impartiranse na biblioteca do centro os seguintes días:
- Mércores 11 de Abril ás 20:00 horas: Como saber se o meu fillo consome drogas
- Mércores 25 de Abril ás 20:00 horas: A xestión emocional na educación
- Mércores 9 de Maio ás 19:30 horas: Adolescencia e resolución de conflitos. O papel da familia
Ao remate de cada charla estades convidados a uns petiscos na cafetería do centro.
Para máis información pódese ver o cartel coa información das charlas.
Onte tivo lugar a final da V Olimpíada Filosófica de Galicia. Esta cita reúne na Facultade de Filosofía de Santiago de Compostela a rapaces e rapazas de toda Galicia que chegan á fase final.
O IES Isidro Parga Pondal leva participando na Olimpíada dende a súa primeira edición e aínda que non é a primeira vez que chega a final, si é a primeira vez que vai participar na final nacional que terá lugar en Mérida, no mes de maio. E por partida dobre, nada menos: na modalidade de fotografía e na de curtametraxe.
Chelsy González Besada e Ana Rodríguez Torresín gañaron onte o Primeiro Premio coa súa curtametraxe Serendipia
Pola súa parte, Alba Collazo Collazo e María Rodríguez Lamas acadaron o terceiro e segundo premio respectivamente na modalidade de fotografía.
Se queres ver os traballos premiados, preme aquí.
En atención á lexislación reguladora do proceso de admisión de alumnado en centros sostidos con fondos públicos (Decreto 254/2012 do 13 de decembro e Orde do 12 de marzo de 2013 modificada por Orde do 25 de xaneiro do 2017) comunicamos que:
Ao ser a demanda de prazas inferior á oferta existente, todos os solicitantes dos niveis educativos quedan admitidos e antes do 25 de abril procederase, sen máis trámites, a publicarse a listaxe pública provisional de todos eles.
Lembramos, en calquera caso, que os solicitantes admitidos deberán formalizar a matrícula no centro educativo entre o 25 de xuño e o 10 de xullo (ESO e Bacharelato).
RESOLUCIÓN do 9 de xaneiro de 2018 (DOG Nº 16 do 23 de xaneiro de 2018)
Prazos de matrícula:
Convocatoria de maio: do 12 ao 23 de marzo de 2018, ambos os dous incluídos.
Convocatoria de setembro: do 2 ao 9 de xullo de 2018, ambos os dous incluídos. As persoas matriculadas para a primeira convocatoria, se non superan a totalidade dos ámbitos da proba, consideraranse matriculadas para a segunda convocatoria sen que teñan que presentar nova documentación.
As solicitudes de inscrición deberán presentarse en soporte papel nos centros educativos que se especifican no punto 3 ou por calquera dos medios establecidos no artigo 16 da Lei 39/2015, do 1 de outubro, do procedemento administrativo común das administracións públicas, utilizando o formulario normalizado (código de procedemento ED540A)que figura como anexo I dispoñible na sede electrónica da Xunta de Galicia, https://sede.xunta.gal.
A Anpa Fonte da Vella concede o 2º premio para o alumnado participante do Segundo Ciclo, no concurso do Entroido.
A actuación premiada foi “Instruction”, das alumnas do grupo de 3º ESO C.
A solicitude de admisión pode presentarse a través da aplicación https://www.edu.xunta.es/admisionalumnado ou de forma presencial no centro docente indicado como primeira opción.
A solicitude de admisión será única e terá carácter vinculante. No caso de presentación de máis dunha solicitude para unha mesma persoa perderá os dereitos de prioridade que puidense corresponderlle.
O que ten garantía de permanencia nun centro, se presenta solicitude de admisión noutro distinto deberá comunicalo, ao mesmo tempo, ao centro de orixe.
O alumnado que ten reserva de praza nun centro, se presenta solicitude de admisión noutro distinto deberá comunicar a renuncia á reserva antes do inicio do prazo de presentación de solicitudes de admisión.
Presentación da solicitude de admisión: do 1 ao 20 de marzo.
Presentación documentación acreditativa dos criterios de baremo: 10 días hábiles contados a partires dos 2 días seguintes ao remate do prazo para presentar as solicitudes de admisión.
O departamento de Lingua e Literatura castelá levou hoxe, 13 de marzo, aos alumnos de 1º de ESO a ver unha representación teatral da Illa do tesouro. E, cando chegaron e estiveron acomodados, saltou a sorpresa. A compañía precisaba de actores, xa que non contaba con suficientes para todos os papeis, e pediron voluntarios entre todos os espectadores, alumnos de varios centros que asistían á actividade.
E foron os nosos alumnos os que aceptaron o reto. Saíron a escena e interpretaron o papel dos piratas desta obra de Robert Louis Stevenson. Na foto podemos ver como foi a cousa. Coidamos que o pasaron ben e comprobaron que hai moitas formas de aprender e que son capaces de enfrontar calquera reto.
Bravo por todos eles.