Departamento de Filoloxía Galega e Latina da Universidade de Vigo
Texto íntegro aprobado polo Departamento de Filoloxía Galega e Latina da Universidade de Vigo:
Señor presidente,
A Dirección do Departamento de Filoloxía Galega e Latina da Universidade de Vigo, por acordo do Consello de Departamento, quere manifestarlle publicamente a súa enorme preocupación perante as actuacións que o goberno da Xunta de Galicia que vostede preside está a pór en práctica sobre a lingua galega.
Tal como consta no Estatuto da Xunta de Galicia o galego é a lingua propia e natural de País, patrimonio común de todos os galegos, mesmo dos que non a falan sempre ou non a falan nunca. E un dos cometidos desa institución política é a protección da Lingua Galega, a súa preservación, modernización e transmisión nas mellores condicións ás xeracións futuras. De igual maneira que as Illas Cíes ou as estatuas de Buda do Afganistán, que derrubou a intolerancia e a barbarie, non deben ser patrimonio e preocupación dun determinado goberno nin dun credo relixioso, a lingua galega non é só patrimonio e preocupación dos seus falantes, senón de todos os galegos e de toda a Humanidade.
Os decretos lingüísticos do ensino elaborados polos gobernos galegos anteriores fixeron avanzar moi pouco a estima da lingua do país, sen dúbida debido aos reiterados incumprimentos da lexislación. Os nosos estudantes non foron capacitados por igual en galego e castelán. De maneira que hoxe existen amplos sectores xuvenís urbanos que son incapaces de falar galego, e non son libres para elixir en que lingua falar. E cando aínda estamos nun proceso de galeguización da xuventude, o novo Goberno da Xunta vén crear un conflito social inexistente ata agora coas medidas regulamentadoras dos usos lingüísticos na administración e no ensino que quere adoptar e que incrementarán con toda seguridade o número de persoas incompetentes en lingua galega.
E vemos con fonda preocupación como, por primeira vez na historia da democracia, un goberno galego se propón lexislar en contra da lingua propia e natural do País que goberna, actuando segundo directrices alleas a Galicia ao dar por boas falacias e prexuízos clasistas difundidos interesadamente que, de poñerse en marcha, suprimirán o galego daqueles dous únicos ámbitos sociais onde a lingua levaba camiño dun certo equilibrio co castelán: a administración pública e o ensino non universitario.
A adopción de medidas como a supresión da proba en galego para acceder á administración é socialmente moi negativa, xa que poderá dar entrada na función pública a funcionarios incompetentes para traballar en Galicia, que descoñecen unha das dúas linguas oficiais, co que o atendemento en galego non estará garantido.
E aínda máis negativa será a situación na que vai quedar o galego no ensino non universitario, condenado a ser un adorno prescindible. A consulta ás familias sen previa información nin refrendo dos profesionais do ensino e do alumnado, resulta de dubidosa legalidade ao non contar coas garantías democráticas necesarias.
Facemos, pois, un chamamento á cordura do Goberno da Xunta e pedímoslle que rectifique o seu comportamento cara á lingua do País, conscientes de que unha lingua só vivirá se a empregamos e esiximos a súa protección mediante o uso escolar e administrativo, xa sexa de forma oral ou escrita.
