Onte rendémoslle a nosa particular homenaxe a Rosalía de Castro cun emotivo recital poétio-musical nun espazo especialmente decorado para ocasión con motivos rosalianos diversos, como as rechamantes “flores poéticas” que o noso alumnado elaborou no obradoiro de pariroflexia organizado polo equipo da Biblioteca. Entre outros adobíos, escollemos libros, revistas, poemas enrolados, axendas, caderniños, chapas.... que se convertirían en agasallos para o alumnado participante na homenaxe.
Nesta celebración os grupos de terceiro musicaron algúns dos seus poemas, rapazas de primeiro sorprendéronos cunhas ben afinadas regueifas e o resto do alumnado da ESO e 1º de bacharelato recitou e dramatizou un ramallo de composicións de amor, desamor, tradicións, costumes, angustias existenciais, saudades, reivindicación da figura feminina ou denuncia da emigración, da miseria e das inxustizas que adoito sufriu o noso pobo. Emoción, nervios, talento, diversión e esforzo recompensado con merecidos agasallos en forma de chapiñas, axendas, cadernos e demais motivos rosalianos. Pola tarde, continuaría o noso tributo a Rosalía de Castro no concello... Unha vez máis, orgullosxs dos nosxs poetas e do noso alumnado!
