Secretaría

No marco das actividades vinculadas ao “mes da muller”, este próximo luns visitaranos o realizador gondomareño Antonio Caeiro, quen nos vén presentar “Eu tamén necesito amar”. Este documental amósanos en primeira persoa a historia íntima de dezasete mulleres da nosa contorna nunha sociedade que, coas feridas aínda abertas da Guerra Civil, estrea unha ditadura que duraría máis de corenta anos.

Trátase, xa que logo, da memoria oral do amor e a represión -política, relixiosa e social- vividos, e sufridos, en tempos de guerra e miseria, de pensamentos e vivencias testemuños dunha época escura, non tan afastada, que cómpre visibilizarmos porque, como reivindica o director “a historia deste país está chea de mulleres, invisibles na maioría das veces, que levantan a súa casa sen precisar de home á sua beira”. Fermosa e necesaria homenaxe á afouteza, afectividade e á liberdade das nosas mulleres! 

Este venres celebrouse na Facultade de Ciencias do Mar de Vigo a fase local da Olimpíada Internacional de Física, e a ela acudiu o noso alumno de 2º de bacharelato Pedro Martínez Rajoy. Aínda que teremos que agardar uns días para saber se consegue ser un dos dous alumnos seleccionados pola Universidade de Vigo para competir na fase nacional -previa á internacional e iberoamericana-, sentímonos moi orgullos@s del, pois chegar aquí xa é todo un triunfo de talento e esforzo. Parabéns a Pedro e ao seu profesor César Rodríguez!

Entre as actividades que ten desenvolvido o noso equipo RRR (Recursos, Residuos, Responsabilidade) cómpre citar unha xornada nocturna de reciclaxe, en colaboraión co departamento de Bioloxía, con charlas e obradoiros diversos, destinados ao alumnado da ESA e ciclos de Electrónica e Administrativo.

Contamos coa asistencia de César Lema que deu unha charla sobre o "Uso de combustible reutilizado no automóbil"; o profesor de Electrónica, José Carlos García, xunto co seu alumnado, explicou "En que consisten as placas fotovoltaicas". Á súa vez, Eva Pérez presentou un obradoiro de cosmética con produtos das abellas. Tamén estivo Pablo Casal para presntar a súa curta Os uruguaios viñeron despois. Finalmente, esta secuencia de actividades rematou cunha representación teatral a cargo de "A Moura" de Chaín, que nos axudou a reflexionar con humor sobre a evolución do proceso de reciclaxe no rural galego.