Escolares

     Cando a xornada comeza, aínda entre as abafantes néboas da mañá, van chegando os rapaces á sinistra biblioteca do IES Elviña (as teas das arañas e as persianas baixadas dan conta do abandono do lugar). En fin, que se unha biblioteca xa é de seu arrepiante no noso país, imaxínense vostedes o sentimento de afogo e terror no día dos defuntos...
    Grazas á colaboración dos diversos departamentos, o espazo puido engalanarse para tan fúnebre ocasión: testemuñas tácitas os esqueletes que saíron dos armarios para escoitar as historias de aparecidos e asasinatos que leron os rapaces (Esconxurados quedaron sapos, demos, cabras e bruxas!). En fin, que chegou o Samaín e foise un ano máis, sen que o sangue chegase ao río... pero si ao fío cortante dos coitelos e dos vampirescos cabeiros que luciron as pantasmas voadizas que percorrían os pasadizos do castelo, quero dicir, os andares do instituto...

     Como xa comezamos o curso, xa comezan as actividades didácticas (pois claro!). A semana pasada, a nosa compañeira Alba, encargada da Biblioteca a partir deste curso, acompañou ao alumnado de 1º de ESO para presentar aos rapaces o espazo dos libros no centro dun xeito lúdico. E o venres día 5 de outubro inaugurouse o salón de actos neste curso cun concerto do guitarrista arxentino Augusto Gabriel Ayala. O concerto, cortesía da asociación Pórtico das artes, tiña como base o traballo cos ritmos da América latina (chamamé, tango, chacarera, zamba...). O alumnado desfrutou dunha hora de concerto entre palmas rítmicas e comentarios didácticos do músico.

 Augusto Gabriel Ayala. Datos biográficos e profesionais

     Guitarrista nado na cidade de Concordia (Entre Ríos, Arxentina) o 4 de outubro de 1998. Nela comezou a tocar desde idade moi temperá. Tivo como primeiro mestre ao seu pai, que lle contaxiou a súa paixón pola música.
     Participa habitualmente en festivais prestixiosos, tal Guitarras do mundo, festivais de tango independente e o Ciclo de Música do Litoral, ademais doutras actividades en centros culturais e teatros de toda Arxentina.
     Ten gravacións no sello discográfico Epsa Music como solista de guitarra. Asimesmo, a súa actividade como concertista é moi variada en moi diversos lugares do mundo (Brasil, España, Turquía e Francia, entre outros).
     Mostra da súa actividade e da súa calidade como intérprete este vídeo da súa canle de Youtube.

     Os alumnos de economía 4º e 1º Bacharelato estiveron de novembro a marzo participando no Programa Young Business Talents, simulador empresarial que permite practicar a toma de decisións dentro dunha empresa, mediante unha competición a nivel nacional.
      Todos os equipos do IES Plurilingüe Elviña chegaron ás semifinais, acadando algúns deles moi boas posicións. O equipo formado por Julia e Ainhoa (4ºB) foi o mellor clasificado. Na imaxe, o diploma acreditativo.