Ciencias naturais

O xoves 8 de abril o alumnado de 1ºESO, xunto cos seus profesores de Bioloxía e Matemáticas, foi ata a área recreativa de Cotelo para realizar a inspección de primavera neste tramo do curso alto do río Lérez. Dita actividade enmárcase dentro do Proxecto Ríos (proxectorios.org),  que é unha iniciativa de Educación e Voluntariado Ambiental promovida pola asociación ecoloxista ADEGA (adega.gal).  

Nesta inspección analizouse o estado de saúde do río mediante o estudo de diversos  parámetros e indicadores: clasificación dos macroinvertebrados que viven no leito do río (son  bioindicadores), estudo da biodiversidade (árbores, réptiles, plantas, etc.), análise da calidade  fisicoquímica (temperatura, nitratos, pH), cálculo do caudal do río, estudo do hábitat, etc. Cos  resultados que obtivemos podemos concluír que o estado de saúde neste treito do río Lérez é  moi bo!  

Cos datos obtidos nesta inspección de primavera xunto coa inspección de outono, na que  tamén participamos, ADEGA elabora anualmente un informe do Estado de Saúde dos Ríos Galegos apoiándose nos resultados proporcionados por todos os grupos participantes no  Proxecto Ríos.

O xoves 12 de marzo, persoal da área de educación ambiental da asociación ecoloxista ADEGA, que ten un programa en colaboración coa entidade coa Dirección Xeral de Patrimonio Natural da Xunta de Galiza, instalaron no noso centro trece paneis da exposición UNHA INVASIÓN SILENCIOSA, onde nos comentan a grave ameaza que supoñen para a biodiversidade galega as especies exóticas invasoras.

A través desta exposición podemos coñecer un pouco máis onde podemos atopar as especies invasoras, como chegan ata aí, o perigo que supoñen para a biodiversidade, os custos que acarrean, as iniciativas que se están a desenvolver para eliminalas e, sobre todo, que é o que podemos facer nós para colaborar a minimizar este problema.

Lamentablemente, esta exposición non foi posible vela debido á suspensión das clases presenciais ao día seguinte da súa montaxe.