IES Camilo José Cela

Rematou outro curso, pero non un curso calquera: este 2023-2024 foi o curso do 50 aniversario do centro, que foi celebrado con diferentes actividades. O 21 de xuño tivo lugar no Auditorio de Padrón o acto final, en que Xosé Manuel González Reboredo, membro do Consello da Cultura Galega e antigo profesor no centro, pronunciou a lección final de curso. Marisel Véliz (a primeira directora) trasladounos as súas lembranzas e Anxo Angueira, escritor e académico da RAG, rememorou os seus tempos de estudante no noso centro.

Tamén participaron Chus Senín, directora entre 2007 e 2011, a alumna da primeira promoción Marisel Llerena e os alumnos Ricardo e Manuel Babío Arcay, pertencentes á primeira xeración que inaugurou o edificio actual do instituto. Para rematar, proxectouse un vídeo que lembra distintos episodios reivindicativos que aconteceron no centro, realizado polo profesor Lois Gil Magariños. Podedes velo premendo na imaxe.

O prazo oficial de matrícula para o vindeiro curso vai do 23 de xuño ao 7 de xullo.

Para organizar o proceso, establécense as seguintes datas de matriculación por niveis:

Martes 25 de xuño: matrícula de 2º de Bacharelato.

Mércores 26 de xuño: matrícula de 1º de Bacharelato e 4º de ESO.

Xoves 27 de xuño: matrícula de 3º de ESO.

Venres 28 de xuño: matrícula de 2º de ESO.

Luns 1 de xullo: matrícula de 1º de ESO.

Lembramos que permanece aberta a convocatoria de axudas para a adquisición de libros de texto e material escolar para o vindeiro curso 2024-2025. O prazo de solicitude remata o 21 de xuño de 2024. Pódese consultar toda a información no apartado Libros de texto desta mesma web, ao que se pode acceder premendo no seguinte enlace. No mesmo apartado está dispoñible a listaxe de libros de texto para o curso 2024-2025, que se pode tamén consultar premendo aquí.

Informamos de que os títulos correspondentes ao alumnado que rematou os seus estudos de ESO e de Bacharelato en 2022 están dispoñibles para a súa recollida nas dependencias da administración do centro.

O pasado 15 de abril, o alumnado de 4º de ESO e 1º de Bacharelato desfrutou dun encontro con profesoras e profesores que deixaron unha importante pegada no IES Camilo José Cela. Bieito Silva, Rita Amigo, Encarna Otero e Emilio Crespo conversaron co alumnado sobre as súas experiencias como docentes e cargos directivos no centro en diversas etapas. A reunión celebrouse no marco dos actos de conmemoración do 50 aniversario do IES.

Todos e todas lembraron con agarimo o seu paso por Padrón e achegaron interesantes reflexións sobre distintos aspectos do ensino público e sobre as súas vivencias ao longo da súa carreira docente. O alumnado participou activamente na conversa.

Unha vez concluído o proceso de admisión ordinaria de alumnado para o vindeiro curso, comunícase que todo o alumnado que fixo a súa solicitude de admisión dentro do prazo establecido está admitido no IES Camilo José Cela para o curso 2024-2025.

Hoxe abriuse o prazo da nova convocatoria de bolsas de estudo para o vindeiro curso 2024-2025. O alumnado destinatario destas bolsas será o que no vindeiro curso realice estudos de FP Básica, Ciclos Formativos de Grao Medio e Superior e estudos de Bacharelato ou superiores.

O prazo de solicitude está aberto desde o 19 de marzo ata o 10 de maio de 2024 ás 15 h. Todo o proceso se realizará a través da sede electrónica do Ministerio de Educación, Formación Profesional e Deportes, no seguinte enderezo: https://www.becaseducacion.gob.es. Tamén poden acceder á publicación no BOE.

Para solicitar a bolsa de estudos é preciso seguir estes pasos:

1. Entrar na sede electrónica https://www.becaseducacion.gob.es. Alí debe facerse un rexistro para crear un usuario e contrasinal.

2. Encher o formulario en liña.

3. Imprimir o xustificante de presentación. Comprobar se se atopa nalgunha das situación para remitir documentación. O enderezo para remitir documentación á unidade de Bolsas é:

XEFATURA TERRITORIAL DA CORUÑA. CONSELLERÍA DE CULTURA, EDUCACIÓN, FORMACIÓN PROFESIONAL E UNIVERSIDADES

Servizo de Apoio aos Servizos Educativos . Sección de Bolsas de Estudo
R/ Vicente Ferrer, 2 - 15071 A Coruña

 4. Durante os meses de xullo e agosto débese estar atento/a ao correo electrónico.

Recoméndase non deixar os trámites para o final.

Teléfonos de información: 981184741 - 981184742 - 881881647 - 981185725 - 981182621

Correo electrónico: bolsas.ed.co@xunta.gal