Blogue da Biblioteca

Durante este Samaín houbo na nosa Bibliotelleiras unha exposición con recomendacións lectoras para os días de lecer dos que gozamos nesta longa fin de semana. Comprende unha selección de relatos terroríficos moi en consonancia con estas datas, tanto en galego como en castelán, inglés e francés. Algúns dos libros propostos foron:

• SHELLEY, Mary: Frankenstein o el moderno Prometeo.
• COSTAS, Ledicia: Escarlatina a cociñeira defunta.
• BOUTÉGÈGE, Reginé: La Momie du Louvre.
• HUTCHINSON, Andrea M: A Message from a Ghost.

A exposición estivo acompañada cunha decoración moi acorde coa temática das lecturas propostas.

A nosa Bibliotelleiras, no seu afán por dar a coñecer a cultura local e facilitarlle aos alumnos recursos literarios próximos á súa contorna e que lles supoñan unha mellora no seu coñecemento dos autores locais, participou nun acto de fomento da lectura organizado o pasado venres no Centro Comercial Odeón de Narón.
 Durante este acto os escritores Juan José Lada e Isabel Ramos, autores veteranos do noso Club de Lectura co seu “Historias de Ferrolterra”, agasallaron á nosa Biblioteca con tres exemplares, asinados e dedicados polos propios autores, das súas novas obras e que, nos próximos días, quedarán a disposición de todos os usuarios/as na Sala de préstamo.
Deixamos unhas fotos destas novas adquisicións e animámosvos a lelas.

Parte do equipo da Bibliotelleiras participou, o pasado 14 de maio en Santiago de Compostela, nas XVI Xornadas dos clubs de lectura. Foi un día cheo de emocións, charlas e obradoiros que comezou cunha entrevista a Arantza Portabales, gañadora do premio dos clubs de lectura de 2024 por ser a autora galega máis lida nas bibliotecas escolares durante este curso. Entregoulle o premio o conselleiro de Educación, Ciencia, Universidades e Formación Profesional, Román Rodríguez.

Animamos a todos os que vos gusta o misterio a adentrarvos nas novelas desta autora destacando, entre outros, títulos como Deixe a súa mensaxe despois do sinal e a saga de novelas protagonizadas polos detectives Abad e Barroso, da que xa hai tres libros publicados: Beleza vermella, A vida secreta de Úrsula Bas eEl hombre que mató a Antía Morgade.

 O pasado día 15 de maio, e como parte da programación do Día das Letras Galegas, celebrouse no Pazo da Cultura de Narón a entrega de premios do XXXIII edición do Certame Intercentros do Concello de Narón; evento ao que asistiron a alcaldesa de Narón, Marian Ferreiro, diversas autoridades educativas e personal directivo, profesorado, ANPAS e alumnado dos centros de ensino participantes: os colexios Virxe do Mar, A Solaina, Ponte de Xuvia, Piñeiros, A Gándara, CRA de Narón, CPI O Feal, e o IES As Telleiras.

Nese acto foron premiados varios traballos do alumnado do noso centro, entre os que se inclúe o contacontos adaptado da novela infantil "Moucho e Cuquiña", presentado polo alumnado do Clube de Lectura de "Robótica e Tecnoloxía".

 Outros dos premiados foron:

• O alumnado da materia de Cultura Audiovisual de Bacharelato co vídeo "Rompendo tópicos"
• As alumnas de 2º da ESO Duna Martínez (primeiro premio) e Aitana Dopico (accesit) na categoria de Narrativa na ESO.
• Cecilia Aneiros premio e accesit en narrativa de Bacharelato.

Noraboa ao alumnado participante polo voso traballo e, especialmente, aos premiados e premiadas.

Podes consultar a noticia na prensa:

• Diario de Ferrol.

Destacamos a publicación do Facebook do concello de Narón onde podedes consultar as fotos do evento.