RESUMO DE ACTIVIDADES

Joyce´s week

Recompilamos a estupenda semana adicada ó escritor irlandés James Joyce. Lembramos a conferencia de apertura ditada polo escritor Bieito Iglesias sobre o Universo Joyce, que interesou moito ó auditorio.

Margarita Estévez analizou na súa charla Ulysses esa novela “difícil de ler”, que fixo exclamar a dúas alumnas de humanidades “Fíxome ganas de lela, vouna ler no verán”; un dos obxectivos está cumprido.

A sesión de lecturas poéticas e narrativas de James Joyce, acompañadas de músicas, tamén vencelladas a textos do dublinés, e presidida polo tradutor de poemas de Chamber Music, o escritor Alfredo Conde, resultou emocionante e do máis suxestivo... pois tentamos recrear o ambiente da lectura do Ulysses no París de Sylvia Beach. Escoitamos textos de Dublineses, Finnegans wake, Ulysses, ou o Diario do artista, moi ben seleccionados por profesorado e alumnado, e de Chamber Music, musicados e interpretados polo alumnado de artes:

Lean out of the window,
   Goldenhair …

O xoves, achegámonos á dificultade da tradución literaria, e escoitamos ó catedrático Carlos Buján disertar de forma moi amena sobre esa dificultade e leu fragmentos de Ulysses; e como somos afortunados e contamos con alumnado chinés, turco, de Marrocos... este alumnado leu fragmentos na súa lingua...

E pechamos coa actuación do alumnado de Artes escénicas que ofreceu a posta en escena de fragmentos do Retrato do artista cando novo, e co concerto do alumnado de Música que interpretou cancións joycianas e aires tradicionais irlandeses.

Na ginkana, tivemos xogos e premios, que interesaron a moito alumnado que aprendeu sobre Joyce e a súa obra, buscando pistas e resolvendo preguntas.

Se sumamos a exposición de material bibliográfico e discográfico, moi louvada polos nosos visitantes... pensamos que esta semana resultou moi educativa e interesante.