Skip to Content

blogue de : teresa

Imaxe de teresa

A CAIXA DE NÉMET

Mér, 03/04/2019 - 20:28 — teresa

Esta semana, Nemet, o trasno da escola de Sísamo, ademais de emprestarnos uns xogos novos, enviounos unha caixa chea de maxia.

Dicía Német, que dentro da caixa se agochaba a persoa máis importante para cada un de nós. Indagamos sobre quen podía agocharse nunha caixa tan pequena. Fixemos hipóteses sobre esa persoa tan importante nas nosas vidas: o mago da palabra, Batman, Ladybug, Német, un can, Spiderman, bolboretas, xoguetes, un gato, un coello,...

A incertidume ía en aumento. Podían ser tantas cousas...

 

 

 

Cando quixemos descubrir de quen se trataba, tivemos que establecer unhas pautas como: ir de un en un esperando pacientemente a quenda; gardar silencio namentres mirábamos para non romper o feitizo e a maxia; volver ao noso sitio coa promesa de non contarlle a ningunha compañeira e compañeiro quen había dentro.

Esa persoa que escondía a caixa é tan importante nas nosas vidas e para cada un de nós, que a temos que coidar e querer moito, porque nos vai acompañar sempre.

Queredes saber de quen se trata...?

Vide á escola e mirade no interior da caixa...

Seguro que vos sorprende...

 

Imaxe de teresa

BATIDO DE FRESA

Mér, 03/04/2019 - 19:11 — teresa

O venres 29 de marzo fixemos un delicioso batido de fresa para acompañar a merenda.

As nenas e nenos de Primaria cortaron as fresas despois de lavalas. As e os de infantil, coa axuda das mestras e do batedor, mesturaron as froitas co iogur.

Esta actividade deunos pé para falar dos iogures de sabores: falamos se están feitos coa froita que indican ou levan outros produtos descoñecidos por nós. Buscamos os ingredientes e levamos máis dunha sorpresa ao descubrir cal é a composición real deles.

O batido estaba moi saboroso..., mmmmm!!!!

 

Imaxe de teresa

ENRAIZANTE DE LENTELLAS

Sáb, 30/03/2019 - 20:25 — teresa

Ao longo desta semana, preparamo un pouco de enraizante de lentellas. Aproveitando que no programa da Tvg "Polo rego" facían este produto, quixemos elaborar a receita na aula. Para iso, puxemos a remollo as lentellas durante 48h. Pasado este tempo, separamos as lentellas da auga e agardamos 12h máis. Finalmente, trituramos as lentellas coa auga apartada e tivemos preparada o noso enraizante, que antes de usar temos que rebaixar con auga: unha proporción de 1 parte por 10 de auga.

Soamente nos queda probalo, a ver cal é a eficacia...

 

 

 

Imaxe de teresa

DESCUBRINDO UNHA PROFESIÓN FÓRA DO COMÚN...

Sáb, 30/03/2019 - 20:14 — teresa

O venres 29 de marzo, os pais de Julia, Raquel e Fernando, achegáronnos unha experiencia nova á escola.

Raquel contounos unha pequena historia sobre Internet a través de dous nenos. Eles queríanse comunicar pero vivían moi lonxe e Internet acurtaba esas distancias. Neste punto, descubrimos que Fernando tiña bastante que ver con que o funcinamento de Internet fose posible.

El é piloto... pero de que? E que tería que ver pilotar con internet? Aí comezamos a formular hipóteses sobre o que pilotaba: coche de carreiras, avión, helicóptero, barco,... a oferta de suxerencias foi variada. Sen embargo, pouco nos podíamos imaxinar que o seu traballo consistía en pilotar un robot submarino que lle permite colocar o cableado de fibra óptica no fondo mariño. Isto fai posible ter conexión a internet.

 

 

 

 

 

 

Escoitamos con atención e interese o que nos tiña que contar Fernando sobre a vida no barco; de ver como traballa o robot no fondo mariñ; da cantidade de cable que utilizan; en que zonas se colocan; ver a algúns animais como un tiburón, un cachalote,...; 

Este é o cable de fibra óptica polo que "viaxa" a información que manexamos en Internet.

 

Despois buscamos na caixa das sorpresas, animais do mar. Eran moi saborosos.

 

Agradecerlle a Fernando e a Raquel que compartisen con nós a xornada do venres, descubríndonos unha profesión descoñecida para nós.

Moitas gracias...

Imaxe de teresa

HORTO VIAXEIRO EN SÍSAMO

Mér, 27/03/2019 - 18:11 — teresa

HORTO

Esta semana veu Manuel Anxo con máis traballo para o horto. Nesta ocasión, foi no de aromáticas onde plantamos amorodos. Primeiro, acondiconamos e preparamos a terra para acomodar as plantas. Despois, coa axuda dun plantador, marcamos os lugares que ocuparían e de seguido, con moito coidado, colléndoas pola terra e non polas follas, colocámolas no lugar indicado e cubrímolas de terra.

Outra tarefa da xornada foi plantar estaquiñas de romeu. Estaban cortadas de xeito oblicuo e logo de eliminar todas as folliñas menos as da punta da estaquiña, plantámolas. Somentes, queda agardar que algunha bote raíces para poder ter romeu na escola.

Distribuir contido


by Dr. Radut