É tempo de recolleita, é tempo de Outono e, cos seus froitos en Infantil estamos a traballar. Os nenos e nenas recollen froitos nas súas casas para traer á escola. Aquí ímolos clasificar. Secos ou carnosos poderemos atopar.
Tamén os estamos a contar, a encher cestas e baleirar. Aprendemos, de paso, os seus nomes, as cores e os nomes das árbores que nolos dan.
O tren acaba de chegar ao noso centro, no Edificio de E. Infantil estano a cargar de froitos de Outono, que todo poderedes degustar: noces, castañas, uvas e mazás...
No CPI Virxe da Saleta queremos apostar unha vez mais pola comida sana e saudable. Así comezamos a desenrolar o Proxecto Alimenta-T Ben, que se engloba dentro do Plan Proxecta 2013/2014.
Para animar ao noso alumnado a que tome froita fixemos entre todos este cartaz que preside a entrada do Edificio de E. Infantil.
O noso lema: "PARA TER MOITA ENERXÍA, FROITA FRESCA CADA DÍA".
Un ano máis o noso Centro vai participar no Plan Proxecta: desenvolvendo o proxecto “Froita na escola” no que participa o alumnado de Educación Infantil. Damos así continuídade ao programa xa desenvolvido no curso anterior, poñendo como obxectivo a promoción dunha alimentación saudable tendo como referencia a froita.
Probando diferentes froitas comprobarán os seus beneficios dende un enfoque globalizador onde estarán presentes as TICs, a música e o inglés. Trataremos de implicar ás familias na comprensión da importancia que ten a froita na alimentación.
