O venres 7 todo o alumnado de ESO do colexio tivo a oportunidade de asistir, na casa da cultura do Concello, á proxección do documental "Contra os elementos" coa presenza dunha das súas protagonista, a atleta Paula Mayobre. Foi interesante comprobar o papel actual da muller en Galicia en diferentes deportes. Uns exemplos máis mediáticos que outros pero en todos os casos sempre admirables. Tal como reza o título...sempre loitando contra os elementos.

Grazas de xeito moi especial a Paula polas súas intervencións. Foi un honor contar coa súa presenza, que dun xeito simbólico podemos considerar o pistoletazo de saída para a carreira popular que como cada ano organizaremos o último domingo de maio en San Sadurniño.

Onte martes 28 de marzo, os rapaces e rapazas de 3º e 4ºESO tiveron a oportunidade de pasar todo en día en Santiago realizando tres actividades moi interesantes.

Polo mañá cedo pasaron un par de horiñas no centro de meteogalicia, aprendendo un montón de cousas de meteoroloxía e soltando un globo sonda para recoller datos en directo. Despois pasamos polas instalacións da televisión de Galicia onde asistimos á emisión de directo do programa A REVISTA. Despois Nuria levounos ao plató onde se fai o telexornal e outros informativos resolvendo as dúbidas e curiosidades que nos pasaban pola cabeza. Despois de comer e gozar dun agradable paseo polo casco histórico de Santiago, puidemos comprobar en persoa o salto de calidade que experimentou o Museo de Historia Natural da Universidade de Santiago. As novas instalacións no parque de Vista Alegre son excelentes e as explicacións dos monitores encargados, acordes a esa calidade. Aprendemos moitas cousas sobre a fauna e a flora de Galicia nun museo que nada ten que envexar a outros de renome nacionais ou internacionais.

En definitiva un día moi agradable onde o comportamento do alumnado foi, como case sempre, modélico. Parabéns a todos.