Estimadas familias:
Dende o CEP de SABARÍS suxerimos unha serie de pautas a ter en conta, co fin de axudar a facer máis levadeira esta situación, de por si complexa e incerta; que fai que os nosos alumn@s teñan que continuar polo momento co seu proceso formativo nas casas.
Na medida do posible, deberiamos tentar normalizar en cada un dos fogares a situación pola que están a pasar os nen@s e axudar entre tod@s para que non supoña, sobre todo unha experiencia que lles xenere ansiedade e angustia. Ao mesmo tempo, temos que intentar que os nen@s sigan evolucionando no seu proceso educativo.
PAUTAS RECOMENDADAS
HORARIOS E RUTINAS: aconséllase intentar manter unha rutina estable e similar a que tiñan os nen@s con anterioiridade a esta situación transitoria. Faise necesario establecer un espazo e un tempo aproximado no cal se levarán a cado as tarefas escolares; preferiblemente de mañá porque polo xeral os nen@s están máis activos mentalmente e soen ter mellor rendemento. Ademais xa están acostumados a traballar na escola nesa mesma franxa horaria.
En casos específicos, e en función da cantidade de traballo a realizar, pode ser beneficioso fraccionar as tarefas entre a mañá e a tarde.
PLANIFICACIÓN DO DÍA (sempre con certa flexibilidade): durante o almorzo pódese establecer que actividades se farán ao longo do día para estruturar o día e anticipar, na medida do posible, o que vai ocorrer (tempo de traballo escolar, tempo de lecer e actividades e horarios permitidos (TV, dispositivos móviles, consola,…), actividades de colaboración na casa,…). Tamén o consideramos un momento idóneo para escoitar e falar con tranquilidade, deixando que os nen@s se expresen (fagan preguntas, compartan ideas, fagan propostas e suxerencias,…).
COIDAR OS HÁBITOS XA ESTABLECIDOS: tanto os hábitos relacionados coa autonomía persoal (hixiene, alimentación, vestido,…) como os hábitos relacionados co traballo escolar (lugar e tempo de traballo/ estudo, responsabilidade e constancia na realización das tarefas, lectura diaria,…).
REALIZACIÓN DAS TAREFAS ESCOLARES ENCOMENDADAS: parécenos importante as seguintes aclaracións no momento de realizar as tarefas do colexio:
- Facer as tarefas nun lugar axeitado, que favoreza a concentración.
- Ter no lugar de traballo individual só o material necesario.
- Facer individualmente as tarefas e só prestar axuda cando esteamos seguros de que realmente non son capaces de facelo por eles mesmos (evitar a sobreprotección).
- Comezar e rematar unha actividade, non deixalas pola metade.
- Avanzar na tarefa e deixar as dúbidas para o final.
- Recomendar pequenos descansos cando vexamos que baixou o nivel de atención e concentración no traballo.
- Motivar e reforzar positivamente o esforzo dos nen@s.
DESENVOLVEMENTO DA AUTONOMÍA PERSOAL: colaboración nas tarefas cotiás do fogar. A axuda do nen@s nas tarefas do fogar pódese, na meirande parte dos casos, facer a través do xogo, e así estarán máis motivados a axudar na casa.
Podemos xogar a (algúns exemplos):
- Facer a clasificación da roupa que se recolle do tendal.
- Facer de axudantes de cociña (limpeza, orde, cociñando,…).
- Pequenos retos e búsquedas do tesouro.
- Facer a limpeza e ordear a súa habitación.
- Facer “misións especiais” (pequenos recados dentro da casa).
- Etc.
Estamos á vosa disposición para aclarar calquera dúbida que podades ter con respecto ao traballo na casa cos vosos fill@s.
No caso de que o consideredes necesario comentade as vosas dúbidas ou inquedanzas co correspondente titor@ e xa eles se poñen en contacto connosco para coordinarnos.
MOITO ÁNIMO E UN SAÚDO AGARIMOSO!