Esta penúltima semana de curso damos un xiro á nosa proposta. Sabemos que traballastes moi duro durante estes meses pasados, así que é hora de desfrutar do bo tempo, da praia, da montaña, da familia, dos paseos en bici... Aproveitade os días de Sol para divertirvos ao aire libre!
- Xuntade cunchas, flores, pauiños... Contádeos, ordenádeos, clasificádeos por tamaños, por categorías...
- Convertídevos en arquitectas/os deseñando castelos de area.
- Facede trasvases de area, de auga... en distintos recipientes.
- Saíde a dar paseos desfrutando da natureza e observando todo o que nos rodea: animais, flores, prantas, árbores e os seus froitos, rochas, algas... Podedes sacar algunha foto do que máis vos guste ou de algo do que descoñezades o nome para despois buscar na casa (en libros, no ordenador, no móbil...).
- Convertídevos en chefs unha vez máis pero desta vez elaborando pratos máis frescos para o verán, como por exemplo ensaladas, macedonia, xeados, batidos... Animásmovos tamén a facer o voso propio recetario de verán!
- Non vos esquezades tampouco de preparar a vosa merenda para as vosas saídas á praia ou á montaña. Lembrade, tal e como facíamos no cole, que debemos empregar fiambreira e cantimplora para reutilizar e reducir o lixo que xeramos.
- Lembrade tamén que sempre debemos botar crema cando imos expoñernos ao Sol (podedes aproveitar para repasar todas as partes do corpo segundo a ides aplicando e os números da protección solar) e beber auga con frecuencia.
