Hoxe remata o curso e polo tanto pechamos tamén as actividades da biblioteca e facémolo DÁNDOLLE  AS  GRAZAS  AOS  BIBLIOAXUDANTES!!

     Aínda que este ano xa recibiron como premio un obradoiro por ser seleccionados no programa de Volunntariado de Lectura - A, tamén desde o centro quixemos facerlle entrega duns pequenos agasallos.

MOITAS  GRAZAS  POLA  VOSA  DEDICACIÓN  Á  BIBLIOTECA!!

A algúns vémosvos o próximo ano pero aos que marchades para o instituto... moita sorte, botarémosvos de menos!!

   Hoxe recibimos a visita do CEIP de Seara para rematar o proxecto Cartas dende a ría. Aínda que pensabamos recibilos no  mirador de Cadeiras e merendar alí con eles, a chuvia decidiu acompañarnos e por iso merendamos no pavillón do colexio onde o alcalde de Sober nos acompañou para recibilos.

   Despois desta merenda, o alumnado do CEIP de Seara reapartiuse en grupos, para realizar diferentes visitas:

    O alumnado de Infantil foi de visita á Granxa da Escola onde Diego e Noelia lles ensinaron as súas instalacións e algunhas das actividades que levan a cabo na súa granxa de ovellas que nesta época está chea de cordeiriños.

 

  O alumnado de 1º e 2º de Primaria estivo na Casa da Fonte, unha granxa onde lles ensinaron as vacas, como as ordeñan e como elaboran produtos artesanais co leite que recollen do seu gando: queixo, manteiga, iogurt... 

   Mentres tanto os nenos e nenas de 3º e 4º de Primaria, visitaron á Rectoral de Gundivós onde Elías lles fixo unha demostración de olería tradicional durante a que elaborou un xarro mostrándolles todos os pasos deste proceso: modelado inicial, secado, cocido, cor e impermeabilizado con resina de pino.

    O alumnado de 5º e 6º coñeceu a Rectoral de Amandi onde descubriron os procesos de cultivo, elaboración e embotellado do viño  finalizando coa degustación de mosto sen alcol. Tamén puideron visitar o mirador desde o que contemplaron a fermosa paisaxe que forman os viñedos.

 

 

  MOITAS  GRAZAS  POR  ESTA  VISITA!!

 AÍNDA  QUE  FOI  UN  DÍA  PASADO  POR  AUGA,

SEGURO  QUE  NON  OLVIDAREMOS  OS  MOMENTOS  VIVIDOS!! 

GALERÍA  DE  IMAXES

      A Asamblea Xeral das Nacións Unidas proclamou en 1972 o 5 de Xuño como Día Mundial do Medio Ambiente coa finalidade de sensibilizar á poboación mundial sobre a importancia de coidar a natureza, de respectar os ecosistemas e de fomentar o respecto ao medio ambiente; obxectivos que tamén forman parte de Axenda 2030.

    No colexio quixemos sumarnos a conmemoración deste día e para iso nas clases de Plástica o alumnado fixo un mural sobre este día que colgamos no corredor. Despois os biblioaxudantes prepararon a lectura do libro Rescate Planeta de Patrick George.

   Coa lectura deste libro Lara, Nayara e Ada, compartiron pequenas accións que todos podemos levar a cabo para que o noso mundo sexa máis verde.

Que tal se usamos menos os coches particulares e imos en transporte público ou bicicleta?

Non podemos esquecernos de recoller sempre o lixo e non tiralo ao campo nin ao mar.

Non encender as luces se non é necesario, reutilizar obxectos que poidan ter unha segunda vida, separar reseiduos, reciclar o plástico, plantar unha árbore...

ESPERAMOS  QUE  ESTA  LECTURA  NOS  AXUDE  A  CONCIENCIARNOS  UN  POUCO  MÁIS  SOBRE  O  NECESARIO  COIDADO  DO  MEDIO  AMBIENTE!!

   Con motivo do 50 aniversario do colexio, convocouse un certame de maquetas do noso centro para o alumnado de Primaria. Neste certame a realidade superou ás expectativas tanto por participación como pola calidade das maquetas que os alumnos e alumnas presentaron así que decidimos recoñecer  o esforzo de todos os participantes cun agasallo que consistía en material escolar para que poidan seguir desenvolvendo o seu talento artístico.

   Nas seguintes imaxes podedes ver ás crianzas que participaron coas súas maquetas; pero non vos preocupedes se non as vedes ben nas fotos porque o día da comida estarán expostas no pavillón do colexio para que todos disfrutedes destas preciosas maquetas!

 

 

 

 

  

 

   

    Desde 1977, o 18 de maio conmemórase o Día Internacional dos Museos (DIM) para concienciar sobre o feito de que os museos son un importante medio para o intercambio cultural, o enriquecemento das culturas e o desenvolvemento da comprensión mutua, da colaboración e da paz entre os pobos.

    Nós quixemos converter o colexio nun gran museo e para iso convertemos os corredores principais en galerías con afamadas obras pictóricas que os alumnos e alumnas de primaria reproduciron. Ademais o propio alumnado foi o encargado de realizar unha visita guiada polas súas obras.

 

  Comezamos a visita na galería de Infantil A, estas crianzas pequeniñas reproduciron "O grito" de Munch, "Noite estrelada" de Van Gogh e "Estudio da cor. Cadrados con círculos concéntricos" de Kandinsky.

  Ademais explicáronos moitísimas cousas e curiosidades sobre estas obras.

   Na exposición correspondente á aula de Infantil B, achegámonos ao puntillismo, que é unha técnica artística que consiste en facer unha obra mediante pequenos puntos, como ben nos explicaron os alumnos desta aula.

    Subimos as escaleiras e atopámonos coa exposición de 1º e 2º de Primaria dedicada a Kandinsky que foi un pintor ruso considerado como un dos fundadores do abstracto. Estes alumos presentáronnos dúas obras "Several circles" e "Árbore da vida"

 

   Continuando o percorrido chegamos ao espazo de 3º e 4º de Primaria. Eles reproduciron varias cadros do pintor catalán J. Miró, un pintor ao que lle gustaba pintar animais; sobre todo os ollos dos animais por iso hai tantos nas súas obras. 

    Primeiro observamos "O xardín"

 

  E despois "Muller con bonito sombreiro e estrela" e "Amencer"

 

 

   Para rematar, achegámonos ao recuncho de 5º e 6º de Primaria que estiveron reproducindo arte aborixe australiano e cadros de orixe xaponés.

 Así, despois de aprender moitísimas cousas sobre a pintura e os museos,  finalizou a nosa visita ao Museo do CEIP Plurilingüe Virxe do Carme!!

Feliz Día dos Museos!!