Inicio » Blog da biblioteca

2021/2022

VISITA DE ROMÁN RODRÍGUEZ, CONSELLEIRO DE CULTURA, EDUCACIÓN E UNIVERSIDADE

   Román Rodríguez González (Conselleiro de Cultura, Educación e Universidade) estivo hoxe no noso centro educativo acompañado de María Carmen Gueimunde González (Xefa Territorial), de Raquel Arias Rodríguez  (Parlamentaria e ex-alcaldesa do noso Concello) e de Luis Fernández Guitián (Alcalde do Concello de Sober e Presidente do Consorcio de Turismo da Ribeira Sacra) para presentar as obras de mellora de eficiencia enerxética que realizará a Consellería no colexio dentro do Plan de Nova Arquitectura Pedagóxica por valor de 260.400 €: renovación de ventás e persianas, cambio de fluorescentes por luminarias LED, substitución dos radiadores de chapa por outros de aluminio, instalación de tarima flotante no salón de actos e a colocación dunha rampla de acceso para mellorar a accesibilidade ao centro.

 
    Ademais de presentar estas obras o Conselleiro tamén coñeceu a nosa biblioteca pertencente ao Plan de Mellora de Bibliotecas Escolares e ao programa Bibliotecas LÍA.2 xunto con outros 24 centros: “Trátase –explicou o conselleiro– de bibliotecas dotadas de recursos tecnolóxicos e audiovisuais, moitas delas con emisora de radio no marco do programa Radio na biblio, como Radiuvín no CEIP Virxe do Carme, e con diferentes espazos que favorecen o traballo multidisciplinar”.
   
   Para rematar esta visita o Conselleiro e o noso alcalde pasaron polos estudos de Radiuvín onde Lucía Rodríguez e Lucas Rodríguez puideron facerlles unha entrevista na que falaron das obras pero tamén de moitos outros temas: a escola rural, a importancia da cultura e das bibliotecas, as súas profesións, as escavacións de Proendos... Podedes escoitar toda a entrevista no seguinte podcast:
 

 

 

    Ademais queremos compartir as verbas que Román Rodríguez nos adicou no libro de firmas xa que son verbas que inclúen tamén ás nosas familias.

 

  Se queredes ampliar a información desta visita, podedes acceder á reseña publicada na páxina da Xunta de Galicia.

Román Rodríguez destaca o compromiso da Xunta co ensino rural

 Imaxes: Xunta de Galicia

 

A BIBLIOTECA ESCOLAR TEN A PALABRA (Texto: Asesoría Bibliotecas Escolares)

   Xa coñecemos o lema escollido pola Consellería de Educación, Universidade e Formación Profesional para as bibliotecas do PLAMBE durante o curso 2021/2022 que quere poñer o foco na palabra e na oralidade: 

A  BIBLIOTECA  ESCOLAR  TEN  A  PALABRA

Imaxe: Pablo Otero

 

     "Os textos escritos e as producións audiovisuais que ofrece a biblioteca en obras de ficción ou de información axudan o alumnado a medrar donos da linguaxe, a ferramenta que lles abre camiños de pensamento, imaxinación, beleza e coñecemento. Mais tamén, as  bibliotecas escolares son espazos sociais de encontro que promoven e facilitan o uso da palabra a través do diálogo, a reflexión, o debate, a exposición, os recitais, a lectura en voz alta, os clubs de lectura… Estas propostas son oportunidade para que o alumnado "tome a palabra" e avance no dominio da linguaxe e da lingua que lle é propia. 
 
 
     Máis aínda, como instrumentos a favor da equidade, as bibliotecas dos centros educativos deben procurar o acceso igualitario ao coñecemento e uso do léxico que garante unha mellor comprensión lectora, toda vez que os expertos nos falan da diferencia abafante entre o número de palabras que contén o léxico do alumnado de infantil en función dos contextos familiares, diferencia que marca xa as posibilidades de éxito fronte á lectura. 
 
 
    Na súa constante e natural evolución, as bibliotecas escolares acolleron a nova oralidade secundaria, que promove a comunicación a través dos medios. Programas como Radio na Biblio, Biblioteca Creativa e Biblioteca Inclusiva, abriron as portas a unha oralidade máis formal en forma de podcasts, audiolibros, espazos de coloquio e expresión, facilitando recursos e oportunidades para a adquisición de habilidades e competencias comunicativas de amplo espectro, pois en tempos de comunicación dixital fanse imprescindibles estas competencias básicas: unha expresión oral rica e coidada e unha interpretación o máis axustada posible dos textos orais dispoñibles. 
 
 
    A Biblioteca Escolar ten a palabra é tamén unha proposta para a recuperación da tradición oral como unha forma de achegar o alumnado ás raíces da cultura na que medra, facilitándolle así as claves para acceder ao rico patrimonio inmaterial galego que ten dereito a coñecer, gozar e darlle continuidade." 
     
 
Distribuir contido