A nosa alumna Candela Fernández acaba de recoller o 1º Premio do Certame de Poesía de Nadal convocado pola Biblioteca Nodal de Lugo en colaboración coas Bibliotecas Públicas.

     O acto de entrega foi no Salón de Actos da propia Biblioteca e cada un dos gañadores recibiu como agasallo un lote de libros, un diploma e unha figura de Sargadelos.

 

 

 

    Para coñecer máis sobre este premio e escoitar o poema na voz da súa autora; prestade atención á entrevista que lle fixeron Hugo e Lucas.

NORABOA  CANDELA!!!

       Hoxe temos unha moi boa nova! RETOMAMOS A  ACTIVIDADE  AS  FAMILIAS  CONTAN   DE  FORMA  PRESENCIAL!!

     Esta é unha actividade que lle gusta moito ao noso alumnado e por iso estamos moi contentos de que as familias se animen a participar.

    Nesta sesión tivemos como invitado na nosa biblioteca a Javier Rodríguez, o pai de Alfonso Rodríguez da aula de Infantil A que se animou a ler o conto A toupiña que quería saber quen lle fixera aquilo na cabeza de Werner Holzwarth e Wolf Erlbruch.

    Nesta historia a toupiña quere averiguar quen lle fixo na cabeza aquilo gordo e marrón que parecía un chourizo.

 

 Quen sería? Unha pomba? Unha vaca? Unha cabra? 

Poderán axudarlle as moscas a descubrilo?

    Para saber como remata o conto podedes escoitar o seguinte programa de Lecturradio: as túas lecturas na nosa radio xa que os nosos invitados pasaron polos estudos de Radiuvín para compartir a lectura con todos os que a queirades escoitar.

MOITAS  GRAZAS  POLA  VOSA  PARTICIPACIÓN!!

 GALERÍA  DE  IMAXES

  Desde fai varios cursos o 24 de febreiro conmemoramos no centro o Día de Rosalía de Castro uníndonos a moitas outras bibliotecas de Galicia. 

  Como non se sabía exactamente a data do seu nacemento, establecérase esta conmemoración o 24 de febreiro porque era o día en que recibiu o bautismo; pero a partir deste ano cambiarase ao 23 de febreiro despois de que a investigadora galega Sagrario Abelleira atopase documentación que confirma o 23 como data real do seu nacemento.

  Independentemente da data, a Asociación de Escritoras e Escritores en Lingua Galega (AELG) propuxo para este ano 2022 o lema #SementadePensamentos  para transmitir a idea de que non hai nada que poida poñer trabas ao nosos pensamentos ou ás nosas ideas. 

  Nós sempre intentamos sementar pensamentos no noso alumnado e darlle ferramentas para que poidan facelos voar. Unha desas ferramentas é a propia poesía de autora que nos emociona cos seus versos e coas súas verbas:

PENSAR [TE] LIBRE

Eu son libre. Nada pode conter a marcha dos meus pensamentos, e eles son a lei que rexe o meu destino. (Rosalía de Castro).

    Por iso, para achegarnos máis a esta idea e á súa poesía, todo o alumnado de primaria participou no recitado de poesía radiofónico que levamos a cabo para esta conmemoración e que podedes escoitar no seguinte podcast:

   Nesta nova sesión do obradoiro Aprende a estudar e Comprendo o que leo os nenos e nenas aprenderon técnicas para facer esquemas; o que seguro que lle virá moi ben para o futuro.

   A través da modalidade CPinclúe (5.2 IGUALA-T) dos Contratos programa achegáronse á nosa biblioteca os científicos de Ciencia en Movemento para realizar o obradoiro MULLERES  INVENTORAS no que falamos de ciencia, inventos e mulleres baixo o lema "prohibido non tocar".

     Con eles coñecemos algúns inventos creados por mulleres pioneiras que conseguiron superar dificultades e facer contribucións moi importantes ao mundo da ciencia, da física, da química, da tecnoloxía... de xeito que a nosa vida diaria non sería a mesma sen elas.

      Por exemplo, sen  Katharine Blodgett  que inventou os  cristais anti reflectantes  e foi a primeira muller en doctorarse en Física na Universidade de Cambridge non poderiamos usar gafas, nin cámaras de fotos, nin telescopios...

     Cos seus coñecementos de mecánica e enxeñeiría,  Josephine Cochrane  fixo realidade unha idea que xa estaba patentada por Joel Houghton: o  lavalouzas. Desde 1983 multitude de fogares e de restaurantes teñen este electrodoméstico nas súas casas.

  Nós aproveitamos para coñecer as propiedades do xabón e ver como a suciedade escapa del!

 

    Un obxecto que tamén se utiliza bastante é o "Mistake Out" ou  típex  inventado por  Bette Nesmith Graham, unha mecanógrafa que creou en  1956  unha mestura de auga e pintura branca para corrixir pequenos erros en papel de forma rápida e eficaz. Despois de que a marca IBM rexeitara comercializalo, decidiu vendelo desde a súa propia casa co nome Liquid Paper.

    Grazas a  Melitta Benz  podemos tomar un café sen impurezas xa que esta ama de casa alemana ideou o  filtro de café  para poder tomar unha taciña del sen posos nin outros restos. Ademais fíxoo a partir dunha folla de papel secante dun caderno de exercicios do seu fillo!

  Neste obradoiro utilizamos o filtros de café para experimentar coa cromatografía e ver como dunha pinga de tinta, aparece unha flor.

      Ángela Ruiz Robles  é unha española que foi a  precursora do libro electrónico  xa que inventou unha enciclopedia mecánica coa finalidade de transmitir coñecementos de forma interactiva con bucinas, luces, pulsadores e complementos móbiles para facer máis a aprendizaxe máis participativa e atractiva.

     Amanda Jones  estaba preocupada pola conservación da comida. Despois de facer varias probas, no s. XIX, conseguiu eliminar o aire dunha lata de conservar inventando así o  envasado ao vacío  sen cociñado previo dos alimentos que patentou co nome "O proceso Jones". Ademais fundou unha empresa de envasado e conservas onde todas as directivas, oficiais e empregadas eran mulleres agás un home que era o encargado de acender a caldeira.

    No obradoiro "envasamos ao vacío" unha chuche que quedou esmirradiña de todo.

 

    Unha muller que inventou algo imprescindible para o mundo automobilístico foi  Mary Anderson  xa que o  limpiaparabrisas  é obra súa e desde 1916 todos os coches incorporan esa especie de brazo mecánico que limpa as gotas da choiva.

    Imaxinádesvos un coche sen limpaparabrisas? Sería imposible conducir baixo a choiva...